Вай ларгсса бигьалагай кьинирдай ГьунчIукьатIрал шяравун нанисса машинарттал ва инсантурал хIисав-ккал дуван бигьа-бигьану къахьунссия. Шикку, личIи-личIисса кIанттурдая бувкIсса гьунчIукьатIигу, вайннал дусталгу гьурттуну, дуллай бия Шяраваллил кьини.
Укунсса батIавурттал яла хъуннамур ххуйшивугу дикIай зурдардий, шиннардий къаккаклакими ккаккаву, куннан кув къакIулми кIул шаву. Ва ялагу, укунсса мажлисру анжагъ дуркуну, хIарчIун, тяхъашиву дурну щаллу къашавугу дур ца цамургу ххуйшиву. Мукун, ГьунчIукьатIрал шяраваллил кьинилул программалул лагрулий вай гьантрай хьунни шяраваллил жямат цачIун буллалисса, махъа нанисса никиран, шяраваллил лавгмуниясса кIулшивурттугу куртI дурну, цала цIанихсса гъанчуная ва шяравачутурая пахру багьан буллалисса давуртту. Вайннул дайдихьу даннин цал цинявппагу лавгуна шяраваллил хIатталлийн.
ГьунчIукьатIрал кьинилул шадлугъирттал дайдихьулул батIаву хьунни цIуну бакьин бувсса шяраваллил КДЦ-раву.
Гихуннай хьунни шяраваллил музейран Аьрасатнал Федерациялул лайкь хьусса художник, гьунчIукьатIиричу Альберт Хаджаевлул цIа дизлазисса батIаву. Ва хьунни «Маэстро» АНО-рал гьурттушиннарайну.
Шадлугъ тIиртIунни шяраваллил ккурандалул бакIчи ХIажибутта ХIусайновлул. Ванал Альберт Хаджаевлуя бувсунни, художник хIисаврай бакъача, инсаннал хасиятрал язими лишанну цаву дусса зунттал чув хIисаврай.
Хъирив махъ буллунни художникнал душнихьхьун, Чачаннал Республикалул лайкь хьусса артистка Мадина Хаджаевахьхьун. Цилва ихтилатраву ванил барчаллагь увкунни ва ишираву чIарав бавцIусса республикалул культуралул министр Зарема Буттаевахь, шяравачутал ХIажибутта ХIусайновлухь, Кьурбанаьли Ибрагьимовлухь, Саида Къушиевахь, шяраваллил инсантурахь. Музейран пишкашран Мадинал дуллунни Альберт Хаджаевлул 2006 шинал дирхьусса «Ахъвазаннащалсса натюрморт» суратрал репродукция, мукунма библиотекалун ва музейран буллунни ттигъанну дунияллийн бувксса «Альберт Хаджаев» тIисса кIива альбомгу. Шиккува кIицI лаган, художник цува сагъну усса чIумала ванал цалла музейран пишкаш дурссар 1973-ку шинал дирхьусса «Теплая осень» тIисса ва аьлимчу МухIаммад Дандамаевлул суратру, мукунна Ибрагьим-Халил Кьурбанаьлиевлул суратгу (2005 ш.) – цирдагу оригиналлу.
Шадлугърайн бавтIсса бусравсса хъамаллуравух бия Дагъусттан Республикалул Музыкантътурал союзрал правлениялул председатель, Аьрасатнал Федерациялул искусствардал лайкь хьусса ишккакку Хан Башировгу, Дагъусттан Республикалул ва Чачаннал Республикалул симфонический оркестрданул дирижер, ЧР-лул халкьуннал артист Илья Петренкогу.
Музейрал чIирай лархъсса, ларгсса шинал аьпалул хьусса художникнал мемориал улттул ялувсса пардав лирккуна Мадина Хаджаевал.
2011-ку шинал, шяраваллин 1000 шин дуллалисса чIумал, Москавлив заказ дурну диркIссар ва иширан хасъсса значокру. Тти гьашинугу вайннул ца партия – 700 значок заказ дурну дия. Ваний дур художник Альберт Хаджаевлул дирхьусса ГьунчIукьатIрал шяраваллил гербрал сурат. Ва значок дуллунни Хан Башировлунгу, Илья Петренконгу.
Цикссагу бувккун бур ГьунчIукьатIрал шярава цала буттал шяравалугу, лакгу, Дагъусттангу машгьур бувансса инсантал, вайнная цимивагу лу чивчуну бур. Шяраваллил лайкьсса инсантуравасса цавайну хъанай бур ГьунчIукьатIрал ЯтIул Ттугъ колхозрал председательшиву дурсса ХIажиев Камил Мухтардул арс (1928-1986 ш.ш.) ва Аьбдуллаев КьурбанмахIаммад МахIаммадлул арс (1899-1977 ш.ш.). Вайннансса аьпалул улттигу тIиртIунни ва кьини. Камил председательсса шиннардий (1955-1969-ку шинну) ГьунчIукьатIрал шяраваллия ва колхозрая Дагъусттаннал тарихрал двухтомникраву щаллусса очерк чивчуну бивкIссар. Колхоз лайкь хьуну диркIссар СССР-данул Шяраваллил хозяйствалул ва ЦК-рал профсоюзрал чулухасса ЯтIул Ттугълин, лархъун диркIссар Республикалул ХIурматрал улттуйн. Камил лайкь хьуну ивкIссар медаллан ва ДАССР-данул Верховный Советрал Президиумрал ХIурматрал грамоталун.
КьурбанмахIаммад Аьбдуллаев – Лакрал райондалул цалчинма орденоносец, Москавлив хьусса колхозниктурал съездрал делегат. Ванал диркIссар хасну цалла цIаний И.В. Сталиннуя дуркIсса телеграммагу.
ЧIявусса гьурттучиталгу, болельщикталгу бусса, кулпатиртталла, тухумиртталла командартту гьурттусса спортрал бяст-ччаллугу хьунни ва кьини. Дунни шяраваллил администрациялул бакIчину ивкIсса ххаллилсса жагьил, ччяни аьпалухьхьун лавгсса Ибрагьимов ХIажибутта Жамалуттиннул арснал аьпалунсса футболданул турнир. Дунни мукуна оьрмулул ва хияллал аргъираву аьпалул хьусса, спортравугу, цайми-цайми иширттавугу хьхьичIунну ивкIсса ХIажимирзаев ХIусман Абусупияннул арснал аьпалунсса теннисрал турнир. Хьунни фронтовик Къардашов Жабраил МахIаммадлул арснал аьпалунсса волейболданул турнир ва Дандамаев АьбдурахIман Оьмарил арснал аьпалунсса шахматирттал турнир. Вай мукьрагу турнирданул бахшиширттал фонд щаллу бувну бия цIа куминнал уссу-ссурваврал, гъанминнал. Бяст-ччаллин хасну хIадур дурну дия хъунисса баннердугу.
Вай циняв шадлугъирттая махъ жямат бавтIунни шяраваллил багъравун ссупралухун. Дянивмур Азиянаву чIярусса шиннардий ялапар хъанай ивкIсса Шамил Къардашовлул бувсса пулаврал хъунма кIункIурдува бутIа къабивссагу къаливчIуна. Зунгу, бигьалагангу кIулсса, лавгмунил кьадру, бучIантIимунил пикри бусса, цайми-цаймигу хъин-хъинсса лишаннайну машгьурсса гьунчIукьатIран хъярч-махсара бувангу, цайра цалла хъяхъаву дувангу кIулссар. ЦацIунна ишла дуллан бикIайсса «Ттуккуччуччулт» тIисса цIа тасттикь дуван кунна, ва кьини вайннал ччувччунни «ттуккугу» – так макет.
МаркIачIаннай клубраву хьунни Шяраваллил кьинилун хас дурсса концерт. Ваний гьуртту хьунни лакрал артистътал Аьли Абакаров, Ямлихан ХIажиев, Диана Кьурбанова, Залихха, ХIажи Кьубиев, Закарижа Дандамаев.
Бадрижамал Аьлиева
