Ларгсса нюжмардий МахIачкъалалив, Дусшиврул къатрал экспозиционно-выставочный залдануву, тIиртIунни Ахъушиял райондалийсса Бархъаллал шяравасса цIа дурксса художниктал-заргалтал МахIаммадхIажиевхъал «Никирттал усттаршиву» («Мастерство поколений») тIисса цIанилусса выставка. Шикку дия буттал МахIаммадхIажи МахIаммадхIажиевлул ва ванал арснал ва душнил, Загьидиннул ва Рукьиятлул, каруннил дурсса 90-ннийн диявайсса давуртту.
Ва кулпатраву заргалнал пиша, бяличIан къабивтун, ххюра никирай бачин бувну бур: ттаттал ппу КьурбанмахIаммад, ттаттахъул Кьурбан ва МахIаммадхIажи, ппу Сяид, ванал арс МахIаммадхIажи ва ваналми оьрчIру Загьидин ва Рукьият.
Цимирагу никирай нанисса заргалтурал пишагу, ттаттахъал аьпагу магьлуву куннасса давурттайнугу буручлачисса кулпатрал чIарав бацIан, вайнная ва вайннал каруннила дурксса ххаллилсса чIюлушиннардия ссихI дуккан ва кьини шиккун бавтIун бия республикалий ва ванил кьатIув ччянива машгьур хьусса художниктал, заргалтал, цайми-цаймигу сянатирттал заллухъру, гъан-маччами, дустал. Вайннал буллалисса ихтилатругу бия МахIаммадхIажиевхъал гьунарданиясса, вайннал цалва пишарахсса, оьтту-ттурчIавурасса ччавриясса, захIмат ххирашивриясса, цивппа вайннащалсса уртакьшиврия, дусшиврия ххарину ва пахрулий бушивриясса. Цикссагу шиннардий дуллай бивкIсса, ва кьини ккаккиялун дирхьусса давуртту дия цахлура цирда гъалгъа тIутIисса, цал урувгун я къабуччинсса, урувгма ялагу-ялагу, макьнатIисрал куна, махъунай кIункIу уллалисса.
МахIаммадхIажинал цала ва цалва кулпатрал чулухасса барчаллагь увкуна чIарав бацIан бувкIминнахь. Выставка тIитIлатIисса шадлугърая махъ хьусса хъун бакъасса ихтилатраву МахIаммадхIажинал бувсуна цинявннуву цанна яла ххирамур даву душиву январьданул 4-нний айивхьуну, ва выставкалийннин къуртал дурсса «Аллагьнал 99-гу цIа» тIисса даву (арцу, гравировка, филигрань, оксидировка). Яла захIматмунин ккалли дуллай ур «Британнал королевал карета» тIимур даву ва ванил хъирив – «Мусил ссут» тIисса цIанилусса ваза (925-мур пробалул арцу, филигрань, мусилщин, коралл).
МахIаммадхIажи МахIаммадхIажиев ур Аьрасатнал Художниктурал союзрал член, Дагъусттаннал халкьуннал художник. Ванал ттаттал ттатта, ттаттахъул ва ппу акъасса, агьлу-авладрай ялагу къачансса заргалтал бивкIун бур, МахIаммадхIажинал щаллу дурну дур вайннал цIа-бакI дусса, бувсса ва дунияллия лавгсса чIунгу ккаккан дурсса, кулпатрал къяртта куннасса даву. 1981-ку шиная шийнай МахIаммадхIажи гьуртту хьуну ур 50-ннийн дирсса выставкарттай. Мюрщиниява шинмай, буттал дуллалимуних буруглай, заргалнал пишалух эшкьи хьусса, Дагъусттаннал Художествалул училище къуртал бувсса Загьидин – Аьрасатнал Художниктурал союзрал член, Дагъусттаннал паччахIлугърал педагогический институтрал художественно-графический факультет къуртал бувсса Рукьият – республикалул, билаятрал ва дунияллул халкьуннал даражардайсса личIи-личIисса выставкардал гьурттучи. Бутталгу, оьрчIалгу дурсса караматсса давуртту хъанай дур аваданшиврул, буллугъшиврул лишаннунугу, жулва авадансса тарихрал ва аьдатирттал бардултнугу. Бархъаллал заргалтурал школалул яла хъинми аьдатру дуручлачисса МахIаммадхIажиевхъал каруннил дурсса давурттал выставка зунтIиссар августрал 24-ннин.
Бадрижамал Аьлиева
