Ва зурул 22-нний МахIачкъалалив Ися Аьбдуллаевлул цIанийсса Лакку мазрал центрданийн увкIун ия архсса Тюменнаясса хъамаличу, техникалул элмурдал доктор, Аьрасатнал лайкь хьусса геолог, «НовТехСервис» ООО-рал генеральный директор Ярагъи Кьурбанов. Най бунува бусанну, ва Тюменнал областьрайсса Дагъусттаннал ХIукуматрал постпредгу, Тюменнал областьрал Жяматийсса палаталул членгу ушиву. Тиккува Тюменнал индустриал университетраву лекциярдугу ккалай ушиву. Ванащал бия кулпат Зарбика ва душ Аидагу.
ЧIярусса шиннардий гъурбатрай зий унугу, Ярагъи Кьурбанов мудангу республикалий хъанахъимуних къулагъас дусса, лакрал миллатрал оьрмулуву хъанахъисса иширттавухгу чялишну хIала уххайсса, иширайнусса чIаравацIавугу дусса инсан ур. Ванал хъунмур мурадгу бия ва Центр хIасул бувсса дугърисса лаккучунахь, Дагъусттаннал Жяматийсса палаталул хъунаманал хъиривчу Ссапарбаг Аьбдуллаевлухь ва ванал лагма лавгминнахь барчаллагьгу куну, зун байбивхьуния шинмай Центрданул даву цукун най дуссарив, ци захIматшивуртту дуссарив кIул баву. МуницIухва, лакрал оьрмулул иширттайн багьлагьисса агьамсса масъаларттугу гьаз баву. Ванащалсса хьунабакьаврий гьуртту хьунни жяматийсса ишккакку Шалласу Шалласуев, цIанихсса альпинист, меценат Зиябуттин ХIажимирзаев, Дагъусттаннал халкьуннал чичу Хизри Илиясов, Лакрал жагьилтурал ккурандалул вакил Нураттин Юсупов.
Центрданул директор, Лакку мазрал учительтурал ассоциациялул модератор ПатIимат Аьлиевал экскурсиялий балжину бувсунни Центр хIасул баврия.
— Гьарца кьини ва Центрданийн заназисса оьрчIругу, вай бувцуну бучIайсса нину-ппугу, хьхьичIва-хьхьичI навагу, дазу дакъасса барчаллагьрай буссару ва Центр тIитIин бакIрайнласу бувсса Ссапарбаг Аьбдуллаевлуйн, – увкунни ванил.
Шалласу Шалласуевлулгу кIицI лавгунни, дунияллий чIявусса мазру бухлаглай чIалай бухьувкун, вара кьини лакку мазралмур бакIрачIан къадучIаншиврул дурсса ца давуну Центргу хъанахъишиву. «Дагъусттаннай хьхьичIра-хьхьичI ва даву дайдирхьунни лакрал. Бигьасса даву къадикIайссар. Ва даврилгу хасъсса захIматшивуртту дуссар, жунна чIалачIиссагу, къачIалачIиссагу. Укунсса, лакку маз лахьхьин буллалисса, кюртти цаймигу тIитIланссар тIий ура. Так хъинну хъирив лавну, пикри бувну дачин дурсса мазрал политикалулли ниттил мазру ябувансса хIукуматрал ва халкьуннал хIарачатрал хIасиллу чIалачIи дуллалиссагу. Укунсса Центрданий ниттил маз лахьхьин буллалаврийну жува оьрчIру патриот асарду хьхьичIунну, буттал улклул тарих кIулну, миллатрал культуралул хIурмат буну тарбия баврил масъалагу бартбигьлагьиссару», – увкунни ванал.
Ссапарбаг Аьбдуллаевлул бувсунни, ва Центрданул даву, дяличIан къариртун, гихуннайгу вара бюхъу-хъитлий дувансса хIарачат цува буллантIишиву. КIицI лавгунни Центрданий, уттинин кунма, гихунмайгу ниттил маз уква лахьхьин буллансса кьаст душиву. ОьрчIал нитти-буттая чIиви-хъунсса хIакь ласлан тIисса хаварду ва маслихIатру цанма цукунчIав кьамулну бакъашиву.
ДакIнин бутанну, шикку зузисса шамагу учительнансса харжгу ванал цалва булайшиву, гьарца аьркинмургу цува дузал дуллай ушиву. Мунияту ихтилатру буллалиминнал гьаз бунни, ва даврил хъар ванайн цайнналу дуртун къариртун, чIарав бацIансса цаймигу букканссар тIисса умудрацIунсса пикрирдугу. МаслихIат бунни сакин дуван фонд. Кумаг бан шайсса инсантал чIарав бавцIуну, фонд хIасул дуварча, Нитти-буттал комитетгу хIалану ххал бигьаван чун ци харж дуван багьлагьиссарив.
Ярагъи Кьурбановлулгу барчаллагь увкунни Ссапарбаг Аьбдуллаевлухь, ва чIявуми цаламур ххисса заманнай лакрал миллатран тирхханну хIисаврайсса кюру тIитIаврихлу.
«Маз бакъахьурча, миллат бакъа хьун най бур. Маз ябаврил ххуллийсса ва давривухгу, лакрал миллатрал оьрмулуву хъанахъисса гьарца давурттавухгу ххуй-ххуйсса къуллугъирттай зузисса жула арсру ва душругу хIала бухланссар тIисса умуд къакьукьинну. Агар чIири-хъунсса взнос дулайсса, дакI дирсса кумаг буван ччиманал бувайсса фонд тIитIирча, Центрданул даву гихуннайгу лахъи лагантIиссар. Цаймигу хайр-мюнпатрансса давуртту дуван хьунтIиссар», – увкунни ванал.
Ярагъи Кьурбановлул цала чулуха арцуйнусса кумаггу бунни фондран. ПатIимат Аьлиевал бувсунни, ванал ссайгъат хъинну бучIи лякъинтIишиву цIуницIа итабакьин «Ниттил маз суратирттайну» тIисса лу. Ва ванил цилва Мусаев Сулайманнущал уртакьну хIадур бувсса лу бур.
«Суратирттащалсса словарьду – вай хъинну машгьурсса луттирдур.
Ялун ххигу бан, на навагу гьуртту хьуссара ва Центр тIитIаврицIун дархIусса батIавурттай. Хьуссара тIитIлатIисса шадлугърайгу. Гьуртту хьуссияв ва Центр тIитIаврил масъала буниялану цалчин гьаз бувсса «Инт» кафелувусса «Ккуркки столданийгу». Инстаграмрайсса центрданул страницалий ххал дувара дарсругу. ВичIи дишара нитти-буттал бусласимуних. Ттунма чIалачIиссаксса, Центрданул хъуннасса даву дуллалиссар. Амма бур, помещение шагьрулул дязаннив, лага-бучIан къулайсса кIанай лякъин къашайссарив тIиссагу. Бухьурча лакраву, Ссапарбаг Аьбдуллаев кунма, цивппа заллусса помещение булунсса инсантал, къулагъас дуванхьуви. Миллатрал маз ябаврил ххуллийсса давриву бутIа бишавугу чирилунссар, тарихравугу цIа личIантIиссар. Лаккучунал лаккучушиврул бурж лажин кIялану биттур бувшиврул барашинна дансса цIакьсса хIуччагу хьунссар.
Ва ялагу, ва Центрданий гьашиву къадурну, ванил филиаллу хIисаврай цаймигу тIитIларча, мугу хъуннасса давуну хьунссия. Ва даврил биялсса опыт бусса учительталгу бур, маз лахьлан гъира бумигу лякъинссар, лахьхьин буллансса материалданул, букварьдал ва цаймигу луттирдал Центрданул кумаг буванссия. Ва миллатрал маз уттава буккаву мурадрайсса даврил чIарав бацIанми цаймигу букканссар уттигу. Ин ша Аллагь!
ПатIимат Рамазанова
