Махъсса ппурттуву МахIачкъалалив пассажиртурал транспорт, хаснува автобусру ва троллейбусру, заназаврил низам хIура дурккун дур: цила низамрай автобусругу, троллейбусругу, маршруткарттугу занан аьркинссар 7-10 минутIрава ликказандарайн букIлай.
Амма му низам лапра даххана хьуну дур, маршруткартту, масалдаран,35-мур, 33-мур «А», 3-мур ва цаймигу занай бур 20-30 минутI ляхну.
Автобусру ва троллейбусру – мукунма. ДукIу ДР-лул Транспортрал ва ххуллул хозяйствалул министрнал хъиривчу Жамбулат Атаевлул пресс-конференциялий журналистътурал буллуна му тагьарданул хIакъиравусса суал.
«ЧIал къавхьуну жу ласун най буру уттигу 47 автобус, яла занантIиссар цила низамрай», – увкуна министрнал хъиривчунал.
Лавсъссар ми автобусругу, амма жяматийсса транспорт саргъунну заназаврил тагьар уттигу даххана хьуну чIалай дакъар.
Июльданул 23-нний МахIачкъалаллал администрациялул прессалул къуллугърал баян бунни хъуншагьрулий транспорт зузаврил низамрал хъирив лаллалисса къуллугъ сакин бантIиссар куну. Мукунсса хIукму хьуну бур пассажиртал ххилаххаврицIун дархIусса законну дуруччаврил масъаларттан хасъсса заседаниялий.
Умуд бур мукунсса контрольданул къуллугъру зузи бувну махъвагу жяматийсса транспортрал хIаллихшинну хъин чулийннай даххана хьунхьуви тIисса.
МахIачкъалаллал администрациялул ва масъалалул хIасиллу дурну махъгу жу бусанну муния «Илчилул» цания ца номерданий.
ХIасан Аьдилов