ЦIуссагу, духссагу тагьар
ЦIуссагу, духссагу тагьар
Дагъусттан Республикалул бакIчи Сергей Меликовлул тапшур бувну, Дагъусттан Республикалул ХIукуматрал председатель Аьбдулмуслим Аьбдулмуслимовлул дунни республикалийсса энергоснабжениялуцIун бавхIусса масъаларттан хас дурсса совещание.
Ваний гьуртту хьунни Дагъусттан Республикалул БакIчинал ва ХIукуматрал Администрациялул каялувшинна, министерстварттал ва ведомстварттал бакIчитал, ЦУР-данул каялувчи, мукунма хасъсса компаниярттал каялувчитал ва прокуратуралул вакилтал.
Совещаниялийсса ихтилатру бия чани лешлашаврийн ва цаймигу коммунал хIаллихшиннарду агьалиначIан багьайсса куццуй диллай дакъашиврийн багьайсса. Шикку Аьбдулмуслим Аьбдулмуслимовлул, «Россети Северный Кавказ» – «Дагэнерго» ПАО-лул электроснабжениялул даража лавай бавриву дуллалисса давурттацIун, кIицI ларгунни диялдакъашивурттугу, хаснурив авариялул тагьар хIасул хьусса чIумал дуваймур анаварну къадуллалаву, агьалиначIангу багьайсса информация къабиллалаву.
Гихунмайсса цалва ихтилатраву ванал бувсунни вай махъсса гьантрай республикалул энергосистемалийн хъунмасса гуж багьшиву, масалдаран, июльданул 23-нний ва аьш лархъун дур 1 360 МВт-райн, ва хъанахъиссар 2024-ку шиналнияр 86 МВТ-рал ягу 6, 8 процентрал лахъсса (2023-ку шиналнияр 1 274 МВт-рал ва 14,5 процентрал лахъсса). Ванийн бувну энергетикалул объектирдай технологиялул чулухасса низам лиян давурттугу чIярусса хьуну дур.
Гихунмай премьер-министрнал бувсунни, вай гьантрай цува шагьрулувух най уна чани левшсса хIисав хьуну, авцIуну 35 минутI дуршиву тиккун-шиккун оьвтIий, чани та булунтIиссарив кIул буллай. «Агьалинан кIулну къабикIай та булунтIиссарив чани. Укун бикIан къааьркинссар!» – увкунни ванал.
– Чани лешлашаврил ва аварий тагьар хIасул хъанахъаврил агьамми сававрдуну личIлай дур: электропередачалул линияртту дух шаву, чани ишла буллалаву лахъ шаву, сетьрал инфраструктуралул ремонтравунсса ва модернизациялувунсса инвестициярттал чаншиву, ччи-ччикун къатри дуллалаву. Ларай хьуну най дур экономика, оьрмулул даража, чани ишла буллалисса объектру. Региондалийн сайки 2 миллион туристътурал букIлай бур, вайннал патирханардай (гостиницардай) ишла дуллалисса прибордайнугу ххи хъанахъиссар энергосетьрайн багьлагьисса гуж», – увкунни ванал. Премьер-министрнал ресурсоснабжающий компаниярттал каялувчитурахь тIутIимуниву увкунни: «Ва зул бизнес дур, мунищала архIал ва зул жаваблувшиннагур. Жу зул давривух хIала бухлай бакъару, амма мунищала жу зухь тIутIиссару – дакъар цасса, тIайласса, системалийнусса даву. ХIакьину зу яла къулагъас дуван аьркинмур кIану – му щалла инфраструктуралул, циняв сетирдал модернизацияр. Цанчирча, дух хьусса электропередачалул линияртту лаллай дакъанутIий чани цалнияр цал чIявуну ишла буллалаврицIун бавхIуну багьлагьисса гужиращал. Ялунссаннун, агьалинащалсса махъуннайсса дахIаврил давугу щаллуну дакъар», – увкунни Аь. Аьбдулмуслимовлул.
Гихунмай ванал бувсунни ва масъала щаллу буван махъсса шиннардий къачансса давуртту дуллай бушиву хасну региондалул бакIчинал сипталийн бувну, ва ишираву федерал центрданул жулла региондалун субсидияртту итабакьлай бушиву, МахIачкъалаливсса электропередачалул 156 линиялува яла аварий тагьардануву диркIсса 72-ннива 22 линия дакьин дуршиву федерал субсидияртту ишла дурну, личIлай душиву дакьин дуван ттигу 50 линия, вайннунсса арцу цалсса къаитадаркьушиву. Бувсунни, «Дагэнерголий» цахьва увкусса куццуй, цIанасса чIумал технологиярттал низам лиявуртту дукьан дуван тIайла бувну бушиву буцирив гужру.
Совещаниялий ихтилат бувсса ЦУР-данул каялувчи Исрафил Исрафиловлул бувсунни июльданул 1-нния 16-ннийн бияннин энергоснабжениялуцIун дархIусса 2576 обращение хьушиву, ларгсса шинал чIумул вава манзилданий мукунсса 5826 обращение диркIшиву. Аммарив вай махъсса 5 гьантлул дянив (июльданул 21-25-нний) хьушиву 2264 обращение (ларгсса шинал вара чIумал дурагу 800 обращение).
– Ванил бусласиссар тагьар вай гьантрай лапра оькки хьуну душиврия ва энергетический кризисрая. ХIакьинусса тагьар укунсса дур – 300 обращение. Вайкссара – лахьхьугу. Вайннул географиягу дур аьдатрайнусса – цалчинмур кIанай – МахIачкъала, кIилчин – Каспийск, хъирив – Дарбант. МахIачкъалалив яла захIматмур тагьар дур Редукторный поселокрай, имам Шамиллул проспектрай, Семендер поселокрай, Ахъушинскийл ва АхIмадхан Султаннул проспектирдай, ЦIусса Хушет поселокрай, И. Казаклул, Мирзабековлул, М. ХIажиевлул, Коркмасовлул ва Богатыревлул кIичIирттаву, – увкунни Дагъусттаннал ЦУР-данул каялувчинал.
Граждан обороналул ва ЧС-рал иширттал министр Нариман КазимахIаммадовлул бувсунни цасса «112» номерданийнсса оьвчаврил статистикалия, шиккун ца хьхьу-кьини дагьсса зангру чIяруми чани лещаврицIун дархIусса дикIайшиву, мукунма ва номерданий медициналул анаварсса кумаг аьркинни, экстренный тагьар хIасул хьунигу оьвтIий бикIайшиву.
Ихтилатру ялагу бунни Дагъусттан Республикалул БакIчинал ва ХIукуматрал Администрациялул каялувчи МахIач Оьмаровлул, ванал хъиривчув – Дагъусттан Республикалул бакIчинал Информациялул политикалул управлениялул ва пресс-службалул начальник Рашид Акавовлул ва м.ц.
ХIадур бувссар
Бадрижамал Аьлиевал
