Тталаткьини Дусшиврул къатлуву хьунни Аьрасатнал ПаччахIлугърал Думалул депутат Султан ХIамзаевлул журналистътуращалсса, блогертуращалсса, хасъсса аьралий операциялул гьурттучитуращалсса ва жяматрал ишккаккултращалсса хьунабакьаву. Укунсса хьунабакьавуртту парламентарийнал дувай лув-ялув гьарца шинал.

Парламентарийнал кIицI лавгунни регионнай депутатътурал агьалинащалсса хьунабакьавуртту дикIан багьлай бушиву тIиртIусса ва лябукку бусса.
Муния махъ Султан ХIамзаевлул бувсунни 2025 шинал дачIи шинай ПаччахIлугърал Думалул дурсса давурттая.
Ванал бусаврийн бувну, кьамул дурну дур 354 закон. Му бакъассагу, хасъсса аьралий операция байбивхьуния шиннай кьамул дурну дур 139 закон хасъсса аьралий операциялул гьурттучитурайн ва вайннал кулпатирттайн дагьайсса, вайннува 15 закон – 2025 шин дайдирхьуния шиннай.
«Аьрасатнал парламентрал агьаммур даву дур билаятрал бакIчинал Федерал собраниялийнсса Рисалалуву ккаккан бувсса амрурду биттур буллалисса. 8-мур созыврал депутатътурал хьхьичI билаятрал бакIчинал бивхьусса бигарду щаллу хъанай буссар ттуршвагу процентрал. Ттун ччай бур парламентрал вивсса структуралул даву жула избирательтурангу чIалай», – увкунни депутатнал.
Султан ХIамзаевлул бувсунни дунияллийсса захIматсса тагьардануву билаятрал хIукуматрал ва парламентрал дуллалисса даврия.
«Жу хIакьину зий буру захIматсса шартIирдаву. Му жунма цинявннан бувчIлачIисса зат бур. Му бакъассагу, кьатIаллил чулухасса ялун бигьаву хIисав дарча – му тIайланнасса аьралий конфликтри, экономикалул я битаврийну билаятрал вивсса саргъуншиврий асар хъанахъисса. Аьрасатнайн къарщину зузисса санкциярттал аьдад лархъун дур 30159-ннийн. Инсаниятрал тарихраву уттинин цавагу билаят хьунабавкьуну бакъар цалархIал вайксса чIярусса санкциярттащал.
Ва жу дурсса анализ дакъарча, дунияллул халкьуннал дянивсса агентствалул дурсса дур.
Вай шартIирдавугума жула ВВП лахъ хьуну дур. КьатIаллил чулухасса ялун бигьаврил шартIирдаву Аьрасатнал ХIукуматраща бюхълай бур билаятрал президентнал Федерал Собраниялийнсса Рисалалуву хьхьичI бивхьусса мурадру щаллуну биттур буван. Федеральный бюджетрал хьхьичI бивхьусса мурадру цил багьайсса куццуй щаллу хъанахъиссар – цIу-цIусса школарду, детсадру, азарханарду, социал объектру, скверду буллай буссар», – увкунни депутатнал.
Хьунабакьаврий сукку бунни туризмалул аралийн багьайсса суаллугу. Микку ХIамзаевлул кIицI лавгунни туризмалул багьри сервисрацIун бавкьусса бакъашиву, ми лапва лахъсса бушиву.
«Ца-ца чIумал республикалул хъамаллуран бувчIлайгума бакъар цивппа багьа ссах буллалиссарив. Агарда республикалийн цалчин бувкIсса туристал ккаккан бувсса «чIирисса дунияллул лагма бувккун» – хьхьирия, вацIрая, зунттурдая, караматсса тIабиаьтрая ва нахIусса дукралия неъмат лавсун рязину лаглай бивкIхьурча, хIакьину сервисрал даража лахъ хьурчагума, жучIава багьри лахъсса бур», – увкунни депутатнал.
Агьамсса ххуттай ххал бивгьунни жяматран нигьачIаву дусса суаллугу – закондалий бакъа наркотикру ишакаш баврийн, хIан ва никотин бусса хIачIия даххаврийн багьайсса,
Парламентарийнал бувсунни вай иширттайн къарщину ПаччахIлугърал Думалул дуллалисса давурттая.
Хьунабакьаврил ахирданий ХIамзаевлул Барчаллагьрал чагъарду буллунни хьхьичIунну зузисса цаппарасса дагъусттанлувтуран.

Зулайхат Тахакьаева