Вай гьантрай Дагъусттаннайн бувкIунни Бесланнаясса хъамал: Аьрасатнал спезназрал Вирттаврал цIанийсса ГБОУ 1-мур СОШ-рал школалул 9-мур классрал дуклаки оьрчIру. Хъамаллурал кьюкьлуву ур учительталгу хIалану 30 инсан. Вай ххарину хьунабавкьунни ЦIуссалакрал райондалий. Хьунабакьин бувкIминнавух бия ЦIуссалакрал райондалул ОМВД -лул хъунама АхIмад Щайхов ва Райондалул Мажлисрал депутатътурал хъунама Аслодин Аслудинов.

Вайннал кIицI лавгунни Ккавкказуллал аьрщарай мудангу цIакьну диркIшиву хъамал ххирашиврул, хIала-гьурттушиврул арарду, Бесланнаясса хъамаллуран Дагъусттаннайнсса аьрххи ххуйчулий дакIний личIанссар тIисса умуд бушиву.
Хъамаллуралгу бувсунни, чIявусса ххуйсса хаварду Дагъусттаннал караматсса тIабиаьтрая баллай, чIалай, экскурсиялий бучIан ччай бивкIшиву ва программалуву чара бакъа Каспий хьхьиривун бучIансса ниятгу душиву.

«Укунсса хьунабакьавурттал уссурвалсса республикарттал дусшиврул гьунурдугу цIакь буллалиссар, хъамаллуран Дагъусттаннал тIабиаьтрал ххуйшивуртту ккаккан дувансса сантгу дагьлагьиссар.
Ва ялагу, ялун нанисса никирачIан жура ирсирай диян дуллалиссару хъамал хIурматрай кьамул буван кIулшиву», – увкунни АхIмад Щайховлул.

ПатIимат Рамазанова