* * *
Дагъусттан Республикалул ХIукуматрал председатель Аьбдулмуслим Аьбдулмуслимовлул ХIурматрал грамотартту дуллуминнавух бур Лакрал райондалул полициялул зузалт Ярагъи АьбдурахIимовгу, Ссамад ХIасановгу.

* * *
Хьурттал шяраву хьунни СВО-рай ливтIусса ХIасанов Жамал Мухтардул арснал ва Абачаров Жамал Сулайманнул арснал аьпалунсса мемориал ултти тIитIлатIисса батIаву. Ваний гьуртту хьунни райондалул администрациялул ва аьралий комиссариатрал вакилтал, ливтIуминнал гъан-маччами, шяраваллил инсантал.
– Жулла дакIурдиву мудангу личIантIиссар цалва бурж щаллу бувминнал, цал виричувшиву хIакьсса патриотизмалул эбратну хьуминнал цIарду, – увкунни, шикку ихтилат буллай, Лакрал райондалул администрациялул бакIчинал хъиривчув Явсупи ХIамзаевлул.
Вара мяъналийсса ихтилатру бунни цайминналгу. Ватандалул мурадру буручлай жанну дуллуминнал аьпалун минутIрайсса пахъ багьну махъ мемориалдануцI дирхьунни тIутIив.
Ва кьини тIиртIусса мемориал ултти дур Буттал кIанттул цIанийсса Хъун дяъвилий жанну дуллуминнан дацIан дурсса гьайкалданучIату арх дакъа. Явсупи МахIаммадовичлул увкусса куццуй, кIивайвагу вирттаврал цалла жанну дуллуну дур буттал улклухлу.
Жамал ХIасановлун ва Жамал Абачаровлун аьпалул хьуну махъ дуллуссар Чувшиврул орденну.

* * *
Лакрал райондалул администрациялий хьунни халкьуннал цала хушрайсса дружинардал (добровольные народные дружины) даву ххал дигьлагьисса батIаву. Ва хьунни райондалул бакIчинал хъиривчув Явсупи ХIамзаевлул каялувшиндаралу. БатIаврий мукунма гьуртту хьунни ГО-лул ва ЧС-лул отделданул начальник Надир ХIасанов, шяраваллавусса халкьуннал дружинардал кьюкьрал командиртал.
Вай дружинардал кумаг буллалиссар кIанттул каялувшиндаран ва ихтиярду дуруччай органнан ца къахьунмур хьусса чIумал (тIабиаьтраву хьусса бала-апатIру, эпидемияртту, аварияртту), мукунма чIявусса инсантал гьурттусса батIавурттал чIумал низам дуруччин.

* * *
Дагъусттаннал региондалул «Память гор» организациялул кIанттул отделениялул председатель Юнус Эфендиев хьунаавкьунни райондалул судрал приставтурал къуллугърал каялувчи Абакар Аьлиевлущал. Хьунабакьаврий ххал бивгьунни СВО-рал гьурттучитуран ва вайннал кулпатирттан кумаг баврил ххуллу-чаранну, хаснуварив иш ИП-лухун (исполнительное производство) багьсса чIумалсса масъаларттаву. КIицI лавгунни ттинин ва журалул кумаг аьркин хьусса урчIрагу лабизаврицIун бавхIуми масъалартту щаллу хьушиву. Абакар Аьлиевлул чIурчIав дунни цува гихунайгу хIадурну ушиврий аьралийтуран ва вайннал кулпатирттан шайсса кумаг буллан.
Вава мурадрай Юнус Эфендиев ваниннин личIи-личIину хьунаавкьуссар прокуратуралул ва виваллил иширттал органнал вакилтуращалгу, хаснурив райондалул прокурор ХIусайн Аьлиловлущал ва ванал кумагчи Рамазан Буттаевлущал, Аьрасатнал Федерациялул МВД-лул «Лакский» Межмуниципальный отделданул штабрал начальник МахIаммадзакир МухIадовлущал ва миграциялул пунктрал начальник МахIаммад Щамхаловлущал.

* * *
Буллай байбивхьунни Щардал ва Хъурхърал шяраваллансса щинаххуллу. Ва даву щаллу хьунтIиссар хъиривмур шинал.

ХIадур бувссар
Бадрижамал Аьлиевал