СВО-рал гьурттучи, Уриннал шяравасса Аьлиев Мурад МахIаммадлул арснал ттининнин къачансса наградартту ларсун дур. Уттигъанну тIурчан, ванан, Дунияллул халкьуннал дянивсса «Салюты Победы» тIисса Дакьаврил Парадрал наградной комитетрал хIукмулийн бувну, дуллунни ца ттигу бусравсса награда – «Герой СВО» цIа ва орден-цIуку. Ва награда дуллалисса батIаву хьунни МахIачкъала шагьрулул Советский райондалул администрациялий.
Увну ур Мурад 1982-ку шинал МахIачкъалалив Уриннал шяравасса МахIаммадлул ва Фатимал кулпатраву. Къуртал бувну бур шагьрулул 26-мур школа, увххун ур Шяраваллил хозяйствалул институтравун менеджментрал факультетрайн. Ва бувккуну махъ, 2004-ку шинал, лавгун ур аьралуннаву къуллугъ буван. Зана хьуну, контрактгу чирчуну, къуллугъ буллан ивкIун ур Чачаннаву. МахIачкъалалив перевод ларсун, къуллугъ буллан ивкIун ур оператив назначениялул 102-мур бригадалуву. Гьуртту хьуну ур жула республикалий хъанай бивкIсса аьралий иширттавух. Баян бувсса дяъви най къабивкIнугу, оьлурккусса, низам дакъасса, къача-къучшивурттал, мардимазаншивурттал чулуха ччи-ччимур хъанай бивкIсса гай шиннардийгу Мурадлун ци-цигу ва цикссагу ккавккун бур.
2024 шинал Мурад, контрактгу чирчуну, хушрай СВО-райн лавгун ур. Агьну ур личIи-личIисса направлениярттайн, Артемовск (Бахмут), Соледар, Часов Яр ва цаймигу шагьрурдайн. Мурадлул наградарттавух дур «АхIмад-Хан Султаннул» медальгу. Ккаккан увну ур «За отвагу» медальданун. Бур Лакрал райондалул администрациялул бакIчи Юсуп МахIаммадовлул чулухасса Барчаллагьрал чагъаргу.
Аьрай яла захIматмур ци дия тIисса суалданухун Мурад буслай ур блиндажраву луркIан дурну щяикIаву (засадалуву), уккан къабюхълахъаву дия тIий, яла ххаримур – тихун жулва артистътал бучIаву, вайннал ккаккан дуллалисса концертру тIий. Ва усса кIанттурдай концертирттащал хьуну бур Зайнаб Махаева, Кристина ва цаймигу. Концертирттал бакIгу, дакIгу аьчух дуккан дайва тIий ур ва.
Мукунна дакIру гъили дайва тIий ур Мурад цачIанма бувкIсса чагъардалгу. Хасну ванал цIаний, ванал позывнойрай («Горец») бувкIун бур чагъар Шамхал поселокрайсса 49-мур школалул дуклаки оьрчIая. ДакIру дайва аьралий ишру нанисса кIанттурдайн ялун бивсса гуманитар кумагралгу тIий, Мурад хъунмасса барчаллагьрай ур Республикалул бакIчи Сергей Алимовичлуйнгу, республикалул агьалинайнгу, аьралийтуран мудангу буллалисса ка-кумаграхлу.
Аьрай асар хьусса иширттавух Мурадлун дакIний ливчIун бур цалла хъирив дагьсса, яруннил хьхьичIсса дрон, тти къурталли, тти пIякь уркунни тIисса кIанай, ци зия хьуссарив, пIякь къаувкунура личIаву. Заннал урувччунна цув тIий ур. Щавурду дирсса ишругу хьуну бур. Ци-цигу хьуну бур, ккавккун бур, дяъви бур дяъви. Амма цанма ккавкмуния чIявусса буслан ччай акъар ва.
Мурадлул бур нахIусса бавкьусса кулпат. «Ттул кулпат – ттул чул бищай кIанур, ттул цIакьсса къинттар» тIий ур ва. Ванал оьрмулул дусну хьуну бур цалва шяравасса, цанмагу маччасса душ Земфира. Ва бувну ва хъунма хьуну бур ЦIуссалаккуй. Вайннал дянив бур 8 шинавусса Фатима, Мурадлул, аьпа биву, ниттил цIа дирзсса душ. Фатима бур бутталгу, ниттилгу ххаришиврунсса душ, ххуйну дугу-дуклакисса, духIин-дуцингу дусса.
ЦIусса наградагу барча дуллай, чIа тIий буру Мурадлун ва ва кунмасса цаймигу чиваркIуннан Ватан ххирашиву ккаккан дуллан някIсса паракьатсса ссавнилу, дуручлангу так билаятрал ва кулпатирттал буллугъшиву, нахIушиву.
Бадрижамал Аьлиева
