Вай гьантрай, жула билаятрал президент Владимир Путиннул указрайн бувну, генерал-лейтенант Сухраб АхIмадовлун Аьра­сатнал Виричувнал цIа дуллунни. Ва СВО байбивхьуния шинай Дагъусттаннаясса 15-ма Виричув хъанай ур. Виричув барча унни Дагъусттаннал бакIчи Сергей Меликовлул.

«Сухраб АхIмадов дазу дакъа Ватандалийн дакI тIайласса, хасиятрал кьянкьасса инсанни. ТIиртIусса дакIнил заллур. Цувагу аьралийчувнал наслур. Ванал ппу, Исмяиллул арс Султангу, къуллугъ кьабивтсса полковникри, нину тIурча, оьрму оьрчIан кIулшивуртту дуллай гьан бувсса инсанни. Тамаша бизансса иш бакъар укун­сса кулпатрава хIакьсса Виричу уккаву. Хасъсса аьралий операция байбивхьуния шинай ва къизгъинний уссар цувагу. Чил ттиликIрах лакъаикIайсса, цува каялувшиву дуллалиминнал чIарату хIура къашайсса, хIакьсса аьралий командирди. Ванал чувшиврийн, опытрайн ва сисаврийн чул бивщуну, хъинну захIмат-жапасса аьралий задачартту бартбивгьуссар. Хаснува ванал цува яргну ккаккан увссар ца яла захIматмур участокрай – Курскаллал чулданий.
Сухраб, барча вил ларайсса цIа! ДакI дарцIуну ура, Ватан дуручлачисса куна, адаврай ина му цIагу дуруччинтIишиврий!» – укун чивчуну бур Меликовлул цала Телеграм-каналданий.
Увссар Сухраб АхIмадов декабрьданул 23-нний 1974 шинал Грозный шагьрулий. Ванал ппу Султан КIихIарчIиял шяравату­ссар, нину Анисат– Ппаласмату. ХIаписарнал кулпатраву увсса ванан оьрчIнияцIава кIул хьуну дур аьраличувнал пишалул мухIлу-хIин.
Новосибирск шагьрулий школа къуртал байхту, дуклан увххун ур Лаваймур аьралий училищалувун. 1999 шинал ва училище къуртал бувния шинай Аьрасатнал армиялуву къуллугъ буллай ур. 2005 шинал къуртал бувну бур М.В. Фрунзел цIанийсса Аьралий академия ва 2018 шинал Генеральный штабрал академия. 2009 шинал ва ивтун ур 155-мур гвардиялул бригадалул командирну. Зий ивкIун ур Тихоокеанский флотрал дазурдайсса аьралуннал хъунаманал хъиривчунугу, 36-мур гвардиялул мотострелковая бригадалул хъунаманугу.
Хасъсса аьралий операция байбивхьувкун, ва каялувшиву дуллалисса морпехтурал 155-мур бригада Донецкаллал Республикалий, Павловскалий аьралий задачартту бартбигьлай бивкIун бур. Декабрь зуруй ва Западный аьралий округрал 20-мур армиялул каялувчину ивтун ур.
2023 шинал февральданул 17-нний ванан, Аьрасатнал президентнал указрайн бувну, генералнал цIа дуллуну дур, декабрь зуруй – генерал-лейтенантнал цIа. Кулпат Маргарита Владимировнащал ванал кIива душгу, ца арсгу тарбия бувну бур.
Ванал паччахIлугърал наградарттавух дур «За службу Родине в Вооружённых Силах РФ» II даражалул орден. Шиккува кIицI лаган аьркинни, вара ордендалун Сухраблул ппугу лайкь хьуну ивкIшиву. Ва ялагу, Султаннулгу къуртал бувну бур кIава М. В. Фрунзел цIанийсса Аьралий академия Москавлив. Томскалий, Новосибирскалий, аьмну Сибирнал аьралий округрай вагу личIи-личIисса давурттай каялувчину ивкIун ур. 2003 шинал полковникнал чиндалуву къуллугъ кьабивтун, МахIачкъалалив цамур даврий зун ивкIун ур. Гьаннайсса, бу­ттал ва арснал Аьрасатнал армиялул цIа-кьини гьаз давриву цIакьсса кIанугу бувгьуну бур.
Аьрасатнал цIусса Виричунал нитти-буттащал (вай МахIачкъалалив ялапар хъанай бур) хьунабавкьуну, тIайлабацIу хьурча, Сухраблущал цащалвагу хьунабавкьуну, гьарза-гьартану вайннал кулпатрая, оьрмулул ххуллия бусанну хъиривсса цания-ца номерданий.
ПатIимат Рамазанова