Шалиб, Ириб, Макдебург

Лакрал шяраваллурду, лакрал шаннагу райондалий дакъасса, дур Дагъусттаннал цайми районнайгу, вайннувасса цагу – ЧIарадиял райондалийсса Шаллал шяравалу. Уттигъанну цалва оьрмулул 90 шинал юбилей кIицI ларгунни ва шяравасса Маммадаев ХIажиапанни Рамазаннул арснал.

Уттининсса оьрмулуву къачансса захIматшивуртту хьунадаркьуну дунугу, дакIнилгу, чурххалгу зирангну, цала ялув цува авцIуну, цала чIунархIалминналгу, махъа наниминналгу эбрат ласунну зана-кьулу хъанай ур бусравсса хъуначув.
Увну ур ХIажиапанни 1935 шинал майрал 5-нний Шалив Рамазаннул ва Аьйшал кулпатраву. Ва акъасса, Рамазаннул ва Аьйшал дянив ялагу бивкIун бур ца душ ва кIия арс. Рамазан ЧIарадиял райондалийсса цалчинсса стахановец ивкIун ур, архъандалий цIакь увну, муруллайх-ххяллайх лахълай, ккутIру дуклай, зий, машинарттансса ххуллурду буллай ивкIун ур. Рамазан ивкIун ур Шаллал колхозрал председательнугу. Ва аьпалул хьуну ур 1945-ку шинал. Му чIумал ХIажиапаннинан диркIун дур 11 шин. Шамагу уссугу, ца ссугу ливчIун бур ятинталну, ниттил каруннихун багьну.

ХIажиапанни школалий буттал шяравува дуклай ивкIун ур, дянивмур даражалул кIулшивурив ларсун дур Ириб шяраву. Лавгун ур аьралуннаву къуллугъ буван. Къуллугъ буллайгу ивкIун ур Германиянаву, Макдебург шагьрулий, цIа дурксса Макдебургуллал полигондалий – яла хъунмамунин ккаллисса майданнив, ГСВГ-лий (Группа Советских Войск в Германии). Низамравугу, зузавривугу хьхьичIунсса ХIажиапаннинахь тийха, Берлиннай, ацIу тIий бивкIун бур хIаписарну, дуклангу тIайла увккун. Та ппурттуву хIаписартал биял къахъанай бивкIун бур. АвцIуссания тIий, тти цал-цал пашмангу хъанан икIара тIий ур ва.

Къуллугъ бувну зана хьуну, бувну бур кулпат, бувцуну бур цанмагу гъансса Аьйша тIисса душ. Махъ къуртал бувну Зооветтехникумгу, ца шинай зий ивкIун ур райондалий. Аьйша зий бивкIун бур шяраву ФАП-рал хъунмурну. КIинттул Аьйша, райцентрдания, Цуриблия, совещаниялия махъ шаппай нанисса кьай духхай машина ламуя багьну, апатIрахьхьун биривну бур. Муния махъ жагьилсса хъамитайпа шанийн багьну бур. Ванин хьхьирил гьава хъинссар тIий хIакинтурал, вайннал кулпат бивзун бур Каспийскалийн. Му чIумал ХIажиапаннинал ва Аьйшал дянив ца душ хьуну бивкIун бур. Муния махъ бувну бур ца душгу, ца оьрчIгу.

Каспийскалий ХIажиапанни зун ивкIун ур «Дагдизель» заводрай 17-мур цехраву муххал усттарну (жестянщикну). ДакI марцIну бувсса захIматрахлу лайкь хьуну ур чIярусса наградарттан, вайннувух дур орденну, медаллугу, захIматрал ветераннал цIагу. АцIнияхъайсса шиннардил мутталий гьарца кьини ахттайнай даврия шавай учIайсса ивкIун ур ва шанийсса кулпатран дукра дулуншиврул. ЦачIу оьрму бутлай 50 шин хьуну, Мусил хъатIул шадлугъгу дурссар вайннал. Шинну хьуну дур Аьйша аьпалул хьуну, ХIажиапанни цувалу ливчIун. Ва ялапар хъанай ур арснащал. Арснал щар Анжела учительну зий бур Каспийскаллал шагьрулул 3-мур школалий. Ва ХIажиапаннинан шамулчинмур душну бацIансса арснал щар бур. Каспийскалийн дахьва бивзсса чIумал, ХIажиапаннинал шагьрулул дязаннив ларсун дур хъун бакъасса къатлущалсса участок. Шикку ванал, дяхтта заводрай зий, хьхьувай лампардал чаннай зий, дурну дур лайкьсса къатри, шяраву куннасса гьартасса лахъисса ларзугу дусса. Шикку ялапар хъанайгу ур цIана арснал кулпатращал.

ХIажиапаннинахь лахъисса ва цIуллу-цIакьсса оьрмулул кьюлтIшиву ссавур тIий цIухлай бура: «Дукра – чанну, заназин – чIяруну». Гьантлун 12 азарва ша ласун аьркинссар тIисса маслихIатирттаяр хьхьичIун увккун, вайннуяр кIилий ххишаласса шаттирду ласлай ур гьарца кьини. Ванал дур цимирагу шинал лахъишиврий цIакь хьусса ва армиялий кунна кьянкьану щаллу дуллалисса аьдат: цара-ца чIумал дукра дукаву (ахттакьуннай ссят 18:00 хьуну гьанттайнсса дуркуну махъ зумув за къадишайсса дур), цара-ца чIумал уттуишаву ва ччяни изаву. Гьантлун чара бакъа ца гьивч ва ца банан, нюжмардий ца кьини – балугъ. ЦIан-чаннаву ивзун, лавгун хьхьирийн, ссятурдийсса заназингу дурну, кIюрххил ссят 7-нний зана шайсса ур шавайн ичIувами дахьва чантIа тIисса чIумал. Ванал дур шанна нигьирайсса велосипед.

Вана укунсса ур Шалиясса ХIажиапанни. Хъуннасса ххаришиву дур ванал цала оьрчIая ва вайннал наслулия.
Барча тIий ХIажиапаннинахь оьрмулул юбилейгу, чIа тIий буру цIакьсса цIуллу-сагъшиву, наслулиясса ххаришиву ва пахру.

Бадрижамал Аьлиева