Ларгсса нюжмардий МахIачкъалалив Поэзиялул театрдануву хьунни СВО-лий Ватандалул мурадру буручлай шагьидну жан дуллусса Хъусращиял шяравасса оьвхъусса багьадурал, Чувшиврул Ордендалун лайкь хьусса Алик Гъазиевлул аьпалун сакин дурсса конкурсрай хьхьичIун ливчусса оьрчIру барча буллалисса мероприятие.

Лакку мазрай пасихIну, дюхханну назмурду ккалаккисса ва конкурс Алик Гъазиевлул ниттирссу, «Илчилул» отделданул редактор Зулайхат Тахакьаева сиптачину ва ванил хIарачатрайну дурсса давур. Ва даврил чIири-хъунсса чIаравбацIаву дурссар ДР-лул Информациялул ва печатьрал агентствалул, «Дагъусттан» Этномедиахолдинграл, ДР-лул Культуралул министерствалул ва «Илчилул» редакциялул.
Дайдихьулий Лакрал театрданул артистка Зульфия Архилаевал балайлухун ккаккан дурна Аликлул оьрмулиясса видеоролик. Ва машгьурсса шаэр Миясат Муслимовал мукъурттийсса балайлул макьангу Дагъусттаннал лайкь хьусса артист Арслан Шахмардановлул магьирну дюхъан дурсса халкьуннал макьан дия.
Дайдихьу дуллалисса махъ лавхъуна гихуннайгу мероприятие дачин дурсса Поэзиялул театрданул директорнал хъиривчу, Дагъусттаннал Чичултрал союзрал лакрал секциялул хъунама Супиян Оьмаровлул. Ванал кIицI лавгуна, Ватан Дуруччул шинан хаснугу дурсса ва конкурсрал гьануми мурадру бушиву билаятрал мурадру буручлай жанну кьурван дурсса вирттал хъамакъабитаву, миннал оьрмурдая буслай, миннахасса назмурду лахьхьин дуллай, оьрчIаву патриот асарду цIакь баву ва архIалла лакку маз яшаврил ххуллийсса давунугу хъанахъишиву.

Зулайхат Тахакьаевал цилвагу увкуна:
«Жул, мукьва ссил, дянив увагу усса ца арс оьрмулува лавгунни, жу канил бугьансса оьрчI махъ къаливчIун, Ватандалул мурадру буруччаврилгу, хъирив нанисса никирал чаннасса ва паракьатсса ялун бучIантIимунил ххуллийгу жан ххира къадурну.
Оьрмулия щакъаливхна Алик дунияллия лавгун махъ, гъюжу дурксса къюкIлингу, видачIра хьусса дакIнингу бансса дарман цамур ляхълай бакъар, ваналгу, ванащал Ватандалул цIаний оь экьибувтIуминналгу аьпа абад бансса давурттаха зурча ба­къасса.
ЛичIувча тти ва конкурс вай оьрчIал дакIурдиву Аликлуясса аьпанугу, вайннаву лакку мазрах, лакку мазрайсса шеърирдах гьавас бутансса ттул чIивисса захIматрал бутIанугу.
Цуксса хIайпнугу, цумур-цагу миллатрал, цумур-цагу билаятрал язими тарихрал ххару чичайссар Ватандалул язи-язими арсваврал оьттух.
ХIакьину ва мероприятиягу ттун дайдишин ччива Аьрасатнал цIусса тарих оьттух чивчусса лакрал вирттавран хас дурсса видеоролик ккаккан даврия. НахIакьсса къахьуннав вайннал экьибувтIусса оь. ЦIуллу-сагъну шаппа-шаппай зана хьуннав Ххувшаврищал аьрайцирив чиваркI. ЧIивисса лакрал миллатрал 94 арс уссар ва видеороликрай, цаягу ххи къахьуннав ванияр тихунай, баяймур так ххарисса баяннав!».

Яла ккаккан дурна СВО байбивхьуния шинмай жанну дуллусса лакрал Вирттаврал цIардугу кIицI лаглагисса, суратругу дусса видеоролик. Ва иттав макь дучIанну дурсса роликгу Зулайхатлул давур. Сайки кIира шинни ванил лакрал Вирттаврал суратру датIлай, миннал аьпа уттава буллалисса давурттавух чялишну хIала бувххун.
Видеороликрал презента­циялуцIун укунма бюххансса балайлул премьерагу хьунни. Дагъусттаннал халкьуннал артистка Нурианна Каллаевал Хъусращиял шяравасса шаэр Булбул Оьмариевал мукъурттийсса Алик Гъазиевлун хас бувсса балай увкунни. Ва балайлул макьандалул автор ур Амрит ХIусайнаев. Вава Амритлул макьандалийсса балай увкуна Дагъусттаннал халкьуннал артистка Луиза Шагьдиловал. Аликлул ниттин СахIилун цIа куну Миясат Муслимовал чивчусса ва балай арсру аьрай ливтIуцири ниттихъан хас бувна. Балай лакку мазрайн таржума бувну бур филологиялул элмурдал кандидат Роза Эльдаровал.

Программалул хъиривмур бутIа оьрчIан бахшишру дуллалисса бия. ОьрчIру барча бан сахIналийн буклай бия республикалул интеллигенциялул вакилтал, бусравсса инсантал.
Цалчинмур кIану бувгьусса Ибрагьимов Кьурбаннун, Щардал школалул 4-мур классрал дуклаки оьрчIан, диплом ва премия (10 000 къуруш) дуллуна «Илчилул» хъунама редактор Руслан Къардашовлул. Шиккува бусан, дукIусса «Илчилул» Ххувшаврин хасну дурсса конкурсрайгу ванал цалчинмур кIану бувгьуссия.
КIилчинмур кIану бувгьусса Ибрагьимова Алджанан (вагу Кьурбаннул ссур) диплом ва премия дуллуна «Илчилул» хъунама редакторнал хъиривчу, Дагъусттаннал халкьуннал шаэр Руслан Башаевлул. Вава кIилчинмур кIану бувгьусса Кьурбанова КьурбанпатIиматлун дипломгу, премиягу дуллуна ДР-лул Жяматийсса палаталул председательнал хъиривчу Ссапарбаг Аьбдуллаевлул. КьурбанпатIиматгу Щардал шяравассар. КIилчинми кIантту бувгьуминнан премиялун дуллуна арул-арулазарда къуруш.
Шамилчинмур кIану бувгьусса Гъазиев Назимлун диплом ва премия дуллуна «Дагъусттан» ГТРК-лул хъунаманал хъиривчу, республикалул ТОКС-рал гьану бивзсса ва 50 шинал мутталий ванил каялувшиву дурсса тележурналист Ссалам Хавчаевлул. Шамилчинми кIантту буллуна ялагу Аьбдуллаев Кьурбаннун – Хьурттал школа, Ибрагьимова Самиран – Щардал школа (ххю-ххюазарда къуруш).
Гихуннайми хIасиллугу укунсса дия:
Мукьилчинмур кIану – Ванатиева Зулайхат, Ванатиева Жамила, ХIажиева Салима, Хьурттал школа;
ЯтIуева Амина, Муртазалиева Рояна, Щардал школа; Дандамаева Умамат, Чапаевкаллал школа (шан-шаназарда къуруш).

Хасъсса бахшишру (ххю-ххюазарда къуруш):
Ибрагьимова Наргиз, Гъумучиял школа – («Илчилул» Телеграм-каналданий лайкру хIисав бувну);
ТухIуев Аьбдул, ЧIяйннал школа – Алик Гъазиев къуллугъ буллай ивкIсса аьралий частьрал чулухасса;
АхIмадова Жамила, ш. Хьур – ДР-лул Печатьрал ва информациялул агентствалул чулухасса;
Кулиев Исмяил, ш.ЦIуссаккул – «Дагестан» Этномедиахолдинграл чулухасса;
Мирзаев Жамалуттин, ЧIяй­ннал школа – Ккуллал райондалул администрациялул бакIчи Шамил Рамазановлул чулухасса;
Гъазиев Шамил, Бариева Жамила, Хьурттал школа – Лакрал райондалул администрациялул бакIчи Юсуп МахIаммадовлул чулухасса;
Давдиева Мариян, Хъусращиял школа – «Сила матерей» ккурандалул чулухасса;
МахIадова Мадина, Сунба­тIуллал школа – Алик Гъазиевлул ссурахъал, СВО байбивхьусса кьинилия шинмай тийх талатисса Исмяил ва Тахакьа Тахакьаевхъал чулухасса премия дуллуна вайннал ссил душнил Раминал.
Аьбдуллаев Мурад, Кусаев Исмяил, Хъусращиял школа – МахIачкъала шагьрулул депутат Бэлла Багъдуевал чулухасса;
Оьмарова ПатIимат, Щардал школа – СВО-лул Аьрасатнал цалчинсса Виричу НурмахIаммад ХIажимахIаммадовлул буттал Энгельс ХIажимахIаммадовлул чулухасса.
Арула оьрчIангу конкурсрай гьурттушинна даврихлусса Барчаллагьрал чагъарду ва арцуйнусса бахшишру дуллуна Зулайхатлул цалла чулухасса. Ванил цаягу оьрчI къулагъас къадурну къаивтунни. Цилва тIийкун, уттиния тинмайгу лакку мазрайсса назмурду лахьлангу, ккалангу гъира багьаншиврул.
«Илчи» кказитрал редакциялул чулухасса бахшиш (ххюазарда къуруш) дуллуна конкурсрайн яла чIявусса дуклаки оьрчIру хIадур бувсса (ацIния шама), Хьурттал школалий лакку мазрал дарсру дихьлахьисса ХIажиева Гулбикан.
Циняв оьрчIан бахшишру дулун сахIналийн гьаз хьуна ДР-лул аьрщарал ва хъуслил иширттал министрнал хъиривчу Эмил Ттатаев, Поэзиялул театрданул директор Елена Гьарунова, Мариян Илиясовал цIанийсса «Дараччи» фондрал президент Гульшан Хасаева, «Сила матерей» ккурандалул хъунмур Сефижат МахIаммадрасулова, Аьрасатнал президент Владимир Путиннул каруннива Чувшиврул Орден ларсъсса Полина Халилова, Дагъусттаннал профсоюзрал идаралул хъунама АьбдурахIман Адамов, Лакку мазрал учительтурал ассоциациялул модератор, Ися Аьбдуллаевлул цIанийсса Лакку мазрал центрданул директор ПатIимат Аьлиева, «Илчилул» отделданул редактор Андриана Аьбдуллаева ва цаймигу бусравсса инсантал. Чара бакъа кIицI буван аьркинни, ва конкурсрай Лакрал ва Ккуллал районнал имамшиву дуллай ивкIсса Бариев МухIаммадманнардул душ Жамила ва Хьурттал школалул директорну зий ивкIсса Гъазиев Хайруттиннул арс Шамил бивкIшиву, вайннан цала чулухасса премияртту дулун Лакрал райондалул бакIчи Юсуп МахIаммадовлул тIайла ув­ккун ивкIшиву администрациялул Информациялул ва аналитикалул отделданул каялувчи ТIагьир АхIмадов. Ванал кIицI лавгунни, Юсуп МахIаммадов чара бакъа цува ва мероприятиялий гьуртту хьун ччай ивкIшиву, оьрчIругу барча буван, Вирттаврал аьпа уттава баврил ххуллий хъин-хъинсса давуртту дуллалисса Зулайхатлухьгу барча­ллагь учин. СахIналийн уккан­сса сант къадагьарчагу, Юсуп МахIаммадовлул барчаллагь увкунни Зулайхат Тахакьаевахь цала Телеграм-каналданий.
«Зулайхат сиптачи хьусса ва агьамсса ва асар хьунсса конкурс так мунил ссил арснал аьпа утт­ава буллалисса даву дакъар. Ва лакрал оьрчIругу гъан бу­ллалисса, миннал творчествагу ккаккан дуллалисса, Ватандалухсса ччавугу цIакь дуллалисса, куртIсса патриот проектри. Дуклаки оьрчIан, поэзиялул каши ишла дурну цала асардая бусансса сант дулаврихлугу, Ватан дурурччу­сса Вир­ттаврал гьунарду дакIнин бутлатисса хIурматрахлугу хъунмасса барчаллагьри Зулайхатлун», – укун чивчуну бур Юсуп МахIаммадовлул.
Барчаллагьрай кIицI лаганна ва конкурсрай Лакрал райондалиясса 22 дуклаки оьрчI гьур­тту хьушиву. Вайннаву чIявуми Щардал, Гъумучиял ва Хьурттал школалул дуклаки оьрчIру бушиву.
Зулайхатлул дуллалисса даврин лахъсса кьимат бивщунни Сефижат МахIаммадрасуловалгу:
– Ва жул ккурандалул активисткар, мудангу чялишну хIала буххай дуллалисса давурттавух, хъинну хъуннасса хъар ларсъсса инсанни», – увкунни ванил. Ккурандалул чулухасса Барчаллагьрал чагъаргу буллунни Зулайхатлун.
Елена Гьаруновалгу кIицI лавгунни, видеороликрайсса жагьилтурал симаннайн я щайхту, дакI къума лаглай диркIхьурчагу, ванил дуллалисса даву жунна цинявннан аьркинсса душиву. Вава мяъна-мурадрайсса бия цаймигу бусравсса инсантурал буллалисса ихтилатругу. Чувшиврул Ордендалул кавалер, СВО-лий жан дуллусса Ссунгъур ХIусмановлул ниттил Мисайл сипталий Ленинкантлив буллай, кIилчинмур зиву дацIан давай буссар жанну дуллусса Вирттаврал аьпалун цIа кусса мизит. «Илчилул» чулуха ва чирилул ххуллийсса даврин чIиви-хъунсса кумаггу бувну, ванихь барчаллагь увкунни хъунама редактор Руслан Къардашовлул. Гулбика ХIажиевал бувккунни мероприятиялий СахIилуйн я щайхту цила дакIниву хIасул хьусса асарду.
Мероприятиялийн бав­тIцириннахь, конкурсрай гьуртту хьусса оьрчIахь, вайннал учительтурахь ва оьрчIру бувцуну бувкIсса нитти-буттахь барчаллагь тIисса ихтилатру бунни АьбдурахIман Адамовлул, Булбул Оьмариевал, Алик Гъазиевлул буттал Багьауттиннул ва ниттил СахIилул.
– Барчаллагь хъунмасса ва шаннагу шинал дянив ттул арснал цIа зумух ласлай бивкIминнайн, ванал аьпалунсса давурттал чIарав бацIлай бивкIцириннайн, шеърирду ва макьанну чирчуминнайн, балайрду увкуминнайн. Арс утта увкссаксса шара, ванал цIа чил зумату бувтари. Ванияр тихунмай зун ххарисса иширттай бакъасса чIарав бацIан къабагьаннав. Ччаврил увччуну, оьрмулия щаливххун, дунияллия неъмат ккавккун лавгссаннал бакъасса аьпа абад буллангу къабагьаннав, – увкунни ванил.

ПатIимат Рамазанова