Ларгсса нюжмардий «Дагестан» РИА-лий гьашинусса хIажлил хIасиллая журналистътурахь бувсунни миллатрал политикалул ва диндалул иширттал министр Энрик Муслимовлул ва «Марва-Турданул» гендиректор Шамил МахIаммадовлул.

«Саоьдуллал Аьрабусттаннал Аьрасатнан ккаккан дурна 25 000 инсаннансса квота, билаятрал хIажитураву чIявуми Дагъусттаннаясса бия. ХIаж буван ччими мудангу квоталий ккаккан бувссаннуяр чIявусса бикIай. Аьмну Аьрасатнансса квотагу хъун дунни Аьрабусттаннал, дукIу 20 000 инсаннан­сса квота дуссия, хасну Дагъусттаннан 8000-8500 кIану булайссия. Гьашинурив хIаж бувссар 10530 инсаннал, вайннавугу 2500 квоталул хIакь буллуссар сенатор ва меценат Сулайман Каримовлул», – увкунни министрнал. Ванал кIицI лавгунни Дагъусттаннал хIажитал низамрай, иминну, хIурматрай къуццу тIий бивкIшиву, Аьрабусттаннал хIажлилсса буллалисса министерствалул вакил Аммар Мохамед Радил хасну цалва цIанияту барчаллагь баян бувшиву.

«ХIаж сантирай, низамрай, ххуйсса даражалий гьаншиврул, хъуннасса даву дурссар Дагъусттаннал ХIукуматралгу, хасну бакIчи Сергей Меликовлул тапшур бувну. ХIажлилсса буллалисса циняв идарартту бавкьуну, хIала-гьурттуну зий бу­ссия. Цаягу инсаннай аьй дувансса иш къавхьунни, цаягу хIажи дунияллия лавгсса ишгу къавхьунни. Ялагума, жулва душнил июнь зурул 20-нний оьрчI був­ссар», – увкунни Муслимовлул. Барчаллагь увкунни Дагъусттаннал Муфтиятрахь ва «Марва-Турданухь», хIажлил даву лавайсса даражалий тIайла дуккан хIарачат буваврихлу.
Шамил МахIаммадовлул бувсунни, хIажлийн наниминнан хIаж-виза дикIансса тIалавшинна диркIшиву, туристическая визалущал хIаж буван къадагъа диркIшиву. «ХIажлийсса гьарманал диркIссар балжисса информация бусса бейджик, агар, системалул сбойза хьуну, код буккин къахъанахъисса иш бухьурча, кIиссурттал къалипру ххал бувну гихунмай итабакьай­ссар хIажитал. Туристическая визалущал хIаж буллалими мукунсса иширттаву авара хъанан бикIайссар, хьуссар ялун ливчу­сса ишру. Жул мукунминнащал цукунчIавсса иш бакъассар, цинявннал хIаж-визарду дуссия», – увкунни гендиректорнал.

Бувсунни хIажитал хIисаврай чара бакъа группардаву цащалва бикIайшиву азарханардай зузисса хIакинтал, анаварсса кумаг буван багьлагьисса иш бухьурча, миннал бувайшиву. Агарда гихунмайсса медициналул кумаг аьркин багьлай бухьурча, Саоьдуллал Аьрабусттаннал азарханардай уква хъин бувайшиву. ХIаж буллалиминнан къулайсса гостиницарду, автобусру миннучIан гъанну булаву, дуки-хIачIиялул дузалшинна, цимурца хIисавравун ларсун, сантирай дузай дуваврия циняв хIажитал рязину, барчаллагьрай бушивугу кIицI лавгунни кIинналагу.

ПатIимат Рамазанова