Июньдалул ахирданийсса бигьалагай кьинирдай Гьун­чIукьатIрал шяравун аьрххилий гьансса тIайлабацIу хьуминнавух буссияв нагу. Ва аьрххилул сиптачигу, сакиншинначигу ия жуна цинявннан ххуйну кIулсса жяматийсса ишккакку, меценат, цIа ларгсса альпинист, Дагъусттаннал лайкь хьусса строитель, Абуссупияннул арс Зиябуттин ХIажимирзаев.

Зий уссар цувагу агьалинан ца яла хайр-мюнпатранмур пишалий – Дагъусттаннал транспортрал ва ххуллурдал хозяйствалул министерствалий, отделданул хъунаману. Ва аьрххилул хъиндайдихьумур дукIура дурссар, ванил тарихгу укунссар. Лакрал интеллигенциялул «Встреча» тIисса ккурандалул ва Мариян Илиясовал цIанийсса «Дараччи» фондрал душваврайн Зиябуттиннул цачIанма хъамалу оьвкуссия. Аьрххи ххуйсса даражалий хьуну, циняв рязину бухьувкун, гьашинугу тикрал бувансса хIукму хьуна.
Лаккуйнсса делегациялуву бия: кIа кIицI ларгсса ккурандалул админ-хъунмур, философиялул элмурдал доктор Асият Буттаева, «Дараччи» фондрал президент Гульшан Хасаева, ДГТУ-лул кьатIаллил мазурдил кафедралул хъунмур, чичу, шаэр Жанна (Нажават) Абуева, А. Тахо-Годил цIанийсса Педагогикалул институтрал оьрус мазрал ва литературалул секторданул хъунмур, Ккавкказуллал чичултрал клубрал президент, шаэр, публицист, таржумачи Миясат Муслимова, «Дагестан» ГТРК-лул лакралмур редакциялул хъунмур, журналист Тамара Закарияева, Дагъусттаннал магьирлугърал лайкь хьусса зузала, «Лезгинка» ансамбльданул хореографиялул школа-студиялул директор, балетмейстер ва хореограф Тарият Къапиева, Дагъусттаннал паччахIлугърал филармониялул директорнал хъиривчу София Разуева, Дагъусттаннал халкьуннал артистка, Лакрал театрданул актриса Луиза Шахдилова, Дагъусттаннал лайкь хьусса артистка Загьидат Муслимова, МахIачкъалаллал 16-мур школалул педагог ПатIимат Аьлиева, «Илчилул» отделданул редактор Андриана Аьбдуллаева, вава кказитрал журналист Имара Саидова.
Ца кулпат кунма, бавкьу­ну, нахIуну, куннаха кув хIурматрай, Занналгу кабавкьуну, бивнав жу ГьунчIукьатIув. Аьрасатнал ца яла сивсума альпинист хIисаврай дунияллул тамансса бюхттулшивурттайн гьаз хьусса Зиябуттиннул цува яхъанахъисса кIичIираваллин дирзсса цIагу дия цацIунна даркьусса: «Арулла бюхттулшиврул цIанийсса» («Улица семи вершин») тIисса. Арулла бюхттулшиврул цIанийсса кIичIиравусса Зиябуттиннул ва Валидал къатригу бюхттулну, авурну чIалачIисса дия.
Ахттаяту жу лавгру щюллишиврувун бахьлавгсса шяраваллил школалийн. ЦIанихсса багъирдал дянивух. Шяраваллил Жяматийсса советрал каялувчи, Аьрасатнал балугъирттал хозяйствалул лайкь хьусса зузала ХIажибутта ХIусайновлуя тIайла хьуну, бия шагьрурдая бувкIсса хъамалгу. Жагьилтурал кьинигу духьувкун, учительтурал ва дуклаки оьрчIал хIала-гьурттуну хIадур дурну дия хъуннасса концерт. Ккаккан дурна хъатIул аьдатгу. Нажагь бакъа шяраву хъатIив къабай­сса заманнай, ва аьдатрал лавгзаманнавун бувцунну, шяраву­сса хъатIайн биян бунну тIий бия циняв, ца зумату кунма. Элмулул, чувшиврул, кIулшивурттал ва гьунардал щаращи хьусса ГьунчIукьатIрал бия артистътурал гьунардугу. Яла тамаша бивзмур ишрив му бия, ва концертрал сиптачи, сакиншинначи бия шяраваллил библиотекалул хъунмур Жамила Юсупова. Ванил мяйжаннугу школа культуралул тIювайн кIура баен бувну бия, цуппа школалий зийвагу бакъанува. Шяраваллил агьулданул тIийкун, «циняв учительталгу къавтIи бувну, дуклаки оьрчIругу артистътал бувну бия».
Лакрал жяматийсса оьрмулул иширттаву хьхьичIунсса гьурттушинна дуллалаврихлу «Дараччилул» чулухасса ХIурматрал грамотарду дуллуна Гульшан Хасаевал Зиябуттин ХIажимирзаевлун, школалул директор Малик Къушиевлун. Грамоталущал арцуйнусса бахшишгу дуллуна «Дараччилул» ГьунчIукьатIувсса филиалданул хъунмур Сарижат Къушиевахьхьун.
Жул делегациялулгу бия школалунсса ссайгъатру. Асият Буттаевал, Нажават Абуевал, Миясат Муслимовал ва ПатIимат Аьлиевал пишкаш бувсса луттирдал чIюйрду ххи хьуссар ГьунчIукьатIрал школалий. Концертрал программа хъиннура ярг дурна Луиза Шахдиловал, Загьидат Муслимовал, Тамара Закарияевал, Асият Буттаевал ва ПатIимат Аьлиевал балайрдал. Шиккува кIицI лаганна, бавтIцириннал дакIру асардал дуцIин дувансса балайрду увкушиву Лакрал райондалул Культуралул управлениялул вакил АьлихIажи Щамхаловлулгу, чIурду бювхъусса цайми балайчитуралгу.
Гьай-гьай, шяраваллил кIичIирттавух буклай, эмаратсса цIувцIучарил дарвазарттай тамаша буллай, зунттал архитектуралия ябатIин къахъанай, хIайранну бивкIсса жул ГьунчIукьатIрал тарихрал хIакъиравусса кIулшивуртту куртIгу, цIакьгу дувансса сантгу дия. Вагур жул аьрххилул цалуннасса цамургу ххуйшиву. Экспедициялун хIисавсса даву духьувкун, делегациялувугу миллатрал интеллигенциялул вирдакIру хьусса вакилтал бухьувкун, ци-цигу «ккуркки столлал» багьасса, агьамсса масъаларттугу гьаз бунни, миллатрал бучIантIимунил ялув дакI цIуцIаврийсса ихтилатругу хьунни.
Ялагу, тарихраву ирсирай цIакь хьусса аьдат дур хъамал кьамул баву. Жува мюрщиний, мудангу хъамаллурах мякьну ялугьлан бикIайссияв, ва шяраву жул хъамал буссар тIий пахрулий буслан бикIайссияв. Пахрулий, хIурматрай учавантIиссар жу цинявнналгу: «Жул ххаллилсса хъамал буссар ГьунчIукьатIрал шяраву – Зиябуттин ва Валида ХIажимирзаевхъул», – увкуну.
Оьрмулухун хъамакъаритан­сса бигьалагаву хьуссар Арулла бюхттулшиврул цIанийсса кIичIиравусса, къилигъ дуну дарцIусса кIизивулийсса къатраву. Сивсуну учингума хьунссар, ЗиябуттиннучIан хъамалу лагаву зияратрайн лавгсса ххуллийсса аьр­ххи хьуссар увкунугу.