ЦIуминалийсса ТIюхчардал школалий (№1) вай гьантрай шадлугърал даражалий лавкьунни дуклаки оьрчIансса «Созвездие» тIисса лагерь.
Сайки ца зуруй дяхтта шикку бигьалаглай буссия 45-нния ливчусса оьрчIру-душру. Шанма группалийх бавчIуну, оьрчIащал зий ия шама вожатый. Аьмну, лагерьданул хъунаманая тIайла хьуну, тарбиячитурайн бияннин, ца кулпат кунма, оьрчIащал зий, миннал къайгъурдай ия 10 зузала.
Лагерьданул смена лавкьунни шадлугърал ва дялахърулул мероприятиялийну. Ва дачин дурну бия школалул завуч Ххадижат ХIажиева. Мероприятие дайдирхьунни Аьрасатнал гимнрахун билаятрал ттугъ гьаз баврийну. Яла оьрчIру зюннав-дачIулущал залданул лагма бувккунни.
Хъирив ихтилат бунни школалул директор Шайх-АхIмад Рамазановлул. Лагерьданийсса оьрчIащал зий ккаккан дурсса лавайсса даражалул пишакаршиврухлу ванал буллунни Барчаллагьрал чагъарду вожатыйтуран, тарбиячитуран, медициналул зузалан, дукра дуллай бивкIминнан. Лагерьданий хьусса спортрал, сурат дишаврил, сочинениярттал ва цаймигу бяст-ччаллаву ххув хьусса ва хьхьичIунсса кIанттурду бувгьусса оьрчIан грамотартту дуллунни педагогтал Рамазан Исмяиловичлул, Руслан Иманалиевичлул ва Ансар Сурхаевичлул.
ОьрчIал ккаккан дунни ххаллилсса программа. Дурккунни назмурду, хьунни спортрал бяст-ччаллу.
Лагерьданийсса чIун оьрчIан мюнпатну ларгунни.
Лажин хIадур дурссар
Андриана Аьбдуллаевал