Вай гьантрай Каспийскалий лахъа-хъунну тIиртIунни хасъсса аьралий операциялул къучагътал Фархад Худайнатовлул ва Артур Амировлул аьпа абад буллалисса ултти.

Шикку гьуртту хьунни Каспийск шагьрулул администрациялул бакIчи Борис Гонцов, ванал хъиривчу Руслан Учакаев, Каспийск шагьрулул аьра­лий комиссар Марат Пашаев, «Боевое братство» суккушиннарал каялувчи МахIаммадаьрип Якьубов, «Защитники Отечества» фондрал, жяматийсса организациярттал вакилтал, къучагътурал гъан-маччами ва дустал.
Аьрасатнал Виричувнал цIа лайкь дурсса Фархад Худайнатовлул аьпа абад буллалисса ула ларчIунни ванал нину ялапар хъанахъисса ХIамзатовлул цIанийсса кIичIиравусса 43а къатрал чIирай.
Виричувнал аьпалун минутI­райсса пахъ багьаву баян бувну махъ, дирхьунни тIутIив. Бунни Виричув дакIнин утлатисса, мунал къучагъшиврия бусласисса ихтилатру.
ДакIнин бутан, Фархад Худайнатов хьуссар хасъсса аьралий операциялий Виричувнал цIа ларсъсса ацIния цалчинма дагъусттанчув.
Гвардиялул прапорщик Худайнатов ивкIссар спецназрал группалул командирнал хъиривчувну. Ванал чувшиврийну ва каялувшиву дан кIулшиврийну цимигу талатавриву жула аьралийтал гуж ххишаласса душманнаяр ххув хьуну бур.
2023-ку шинал сентябрь зуруй Запорожуллал областьрай­сса Новопокровка тIисса шяраву ванал каялувшиву дуллалисса кьюкьа душманнал цIарахьхьун дирирну дур. Шанна ссятрал мутталий Фархад ивкIун ур минарду дирхьусса кIанттурдайх аьралийтал нигьачIаву дакъанийн буккан буллай. ЗахIматсса щаву цайннагу дирну дур, амма душман махъаллил хьуннин талай ивкIун ур. ОьлицIал хьу­сса Фархад ххассал ан къавхьуну ур.
Хасъсса аьралий операциялий ккаккан дурсса чувшиврухлу Фархадлул цикссагу аьра­лий наградартту лайкь дурну дур жан дулуннингу. Ва ия кIира Чувшиврул ордендалул ва «За заслуги перед Отечеством» 4-мур даражалул ордендалул, 4-мур даражалул Георгиевский ххачлил, «За отвагу» ва Жуковлул медаллал заллу. Къуллугърал бурж биттур буллай кка­ккан дурсса чувшиврухлу аьпалул хьуну махъ Фархад Худайнатовлун дуллуну дур Аьрасатнал Виричувнал цIа.