Вай гьантрай Дагъусттаннай хьунни «Работа России. Время возможностей» тIисса агьали давурттал дузал буллалисса щалагу Аьрасатнал ярмаркалул кIилчинмур бутIа. Ва хьуссар «Кадры» тIисса национал проектрал лагрулий.
Ярмаркалул даву дайдихьлахьисса мажлис тIивтIунни ДР-лул захIматрал министр МахIаммадзагьид Кихасуровлул. Шикку мукунма гьуртту хьунни ДР-лул ХIукуматрал председательнал хъиривчу Руслан Аьлиев, республикалул министерстварттал ва ведомстварттал вакилтал.
Гьарта-гьарзасса дия ярмаркалул программа. Агьали давурттал дузал буллалисса ярмарка, МахIачкъалалив дакъассагу, республикалул цинявппа шагьрурдай ва районнайгу хьуссар. Ярмаркалул лагрулийсса агьамми мероприятияртту хьуссар МахIачкъалалив.
Министрнал бувсунни гьашину ярмаркалий 10 азарва вакансия бушиву.
– Аьрасатнал цинярдагу регионнай архIал дайдирхьуссар ва ярмаркалул лагрулийсса мероприятияртту. Жула республикалий дуллалисса ярмаркалул мероприятиярттай гьуртту хьуну ур 17 азара инсан. Ва хъуннасса агьамшиву дусса даврил цачIун буллалиссар Аьрасатнал билаятрайсса цинявппагу давурттах луглагими ва давурттал дузал буллалими. Республикалий дуллалисса ярмаркалий гьуртту хьунни Санкт-Петербургуллал, Ульяновскаллал ва Ростовуллал областирдаясса предприятиярттал вакилтал.
Хъунисса ва хьхьичIунсса компаниярттал баян буллай бур цачIавасса вакансиярттая ва сакин дуллай бур карьералул лавай хьунсса сант. Гьурттучитуран кIул хъанай бур цIусса вакансиярттая ва даврийн кьамул буллалиминнансса хIукуматрал чулухасса ка-кумаграя. Му бакъассагу, бюхълай бур, давурттал дузал буллалиминнащал маслихIатру ккавккун, жула региондалий дакъассагу, республикалул кьатIувгу давуртту лякъин, – увкунни министрнал.
ДакIнин бутанну, ярмаркалул цалчинмур бутIул лагрулий давурттал дузал увшиву 840 инсан.
Ярмаркалий хьунни «Мой бизнес» ва «Даглизингфонд» тIисса идарарттал пишакартурал давурттах луглагиминнан мюнпат бусса маслихIатру буллалисса майданну.
Шиккува бия давурттал дузал буллалими ва давурттах луглагими хIала-гьурттуну зунсса ва агропромышленный предприятиярттал пишакартал цачIун буллалисса хасъсса майданну. Бия жяматийсса идарарттал ва политикийсса центрдал вакилтуращал хIала-гьурттуну зунсса ихтиярду дусса майдангу.
Дузал дурну дия, аьралий комиссариатрал вакилтуращал контракт дурну, хасъсса аьралий операциялий гьуртту хьун бюхъайсса шартIру. Ярмаркалий бия «Годекан для СВОих» тIисса, хасъсса аьралий операциялул гьурттучитуран маслихIатру буллалисса, ва «Очаг для СВОих» тIисса, хасъсса аьралий операциялул гьурттучитурал ниттихъал ва кулпатирттал чIарав бацIлацIисса, клубру.
Хьунни давурттах луглагиминнансса тренингру, семинарду ва хъуними классирттал дуклаки оьрчIансса «Вакансия» тIисса тIуркIу, давурттал дузал буллалиминнал чулухасса презентацияртту, личIи-личIисса пишардал сферардавусса мастер-классру.
Министрнал бусаврийн бувну, ярмаркалий яла тIалавми пишарду бур кIулшиву дулаврил, цIуллу-сагъшиврул, строительствалул, хъамал кьамул баврил бизнесрал сферардавусса. Республикалул предприятияртту инженертурах, ЧПУ-лул станокру зузи байсса оператортурах, токарь-фрезеровщиктурах, туризмалуву зунсса экспертътурах мюхтажну бусса бур.
Ярмаркалий республикалул творчествалул коллективирттал ккаккан дунни авадансса концертрал программа.
Имара Саидова
