АцIра шин лях ларгссия Вихьуллал шяраву цIусса школа буллай байбивхьуну махъсса давуртту дацIан дурну. Вана утти, май зуруй, цакьнира дайдирхьуми давуртту гихуннайгу дуллай байбивхьунни. На хьунаавкьура Вихьуллал шяраваллил школалул директор МахIаммадов Аьлил Оьмарил арснащал. Ванал бувсмур бусанна зухьгу.

– Вихьуллал шяраву цалчин школа тIивтIуну бивкIун бур 1928-ку шинал, цуппагу бивкIссар 4 класс бусса байбихьулул школа. 1936-ку шинал гания хьун бувссар 7 класс бусса школа. Гайра шиннардий «халкьуннал стройкалул» лагрулий дурну дур Вихьуллал шяраву школалул къатри. Гай къатравугу бивкIссар бувагу 5-6 оьрчI щяикIан бюхъайсса классру. Яла, махъ, 1956-ку шинал, вания бувссар дянивмур даражалул школа. Му чIумал муку­нма, «халкьуннал стройкалул» лагрулий ва дуклаки оьрчIал кумаграйну, бувну бур ялагу кIива корпус ва мастерскойрттал корпус. Вайннулва ялун, хIукуматрал кумаграйну, 1977-ку шинал фин къатрал лагрулийсса, ятIулсса кирпичирттая бувсса корпусгу ххи бувссар. Вихьуллал школалийн, дянивмур даражалул бувайхту, дуклан занан бивкIссар лагма щархъавасса оьрчIругу – Ссухъияту, Къянияту, ЦIуйшату, Хъювхъату, Инишату, Вираттату, Ккуцияту. БивкIссар школалуцIун интернатгу. ДиркIссар Вихьуллал школалий сайки 700 оьрчIаяр ххисса оьрчIру бусса шиннугу. Махъ хIукму бувссар Вихьлив буван цIусса школа. Му буллай байбивхьунугу бивкIссар 2011-ку шинал. Амма 2014-ку шинал, личIи-личIисса багьан­тту хьхьичIун багьлай, давуртту дацIан дурну дуссия.
Гьашину инттухунай Лакрал райондалийн увкIун уссия Дагъусттаннал ХIукуматрал председатель Аьбдулмуслим Аьбдулмуслимов. Жу Дагъусттаннал дуккаврил министр ЯхIия Бучаевлущал архIал хьунабавкьуссияв ванащал, бувсъссия школалул тагьардания. Муния махъ буллан байбивхьуссар школа. Ванил цалчинмур зивугу, спортзалданул чIирттугу цакьнива бувну буссия. Утти дуллай ­буссар гихуннайми давуртту. Шикку зий бур яруссаннал миллатрал вакилтал…
Укун бувсунни ттухь Аьлиллул. ЧIа учинну ва школа тIитIлатIисса кьини ччяни дучIаннав куну.
ХIажимурад ХIусайнов,
ш. Вихьул