Гьашину ЧIяйннал школалий цалчин тIивтIунни оьрчIансса гъинтнил лагерь. Шиккун занай бур шяравасса ва шагьрурдая бувкIсса 30-нния ливчусса оьрчIру.
Гьарица кьини вайннащал личIи-личIисса кIулшивуртту дулаврил ва дялахърулул программардай зий бур школалул директор Альбина ХIаммакуевал каялувшиннаралусса тарбиячитал ПатIимат СутIаева ва Ирина Къаллаева. ОьрчIру занай бур экскурсиярдайн, дихьлай бур суратру, вайннащал дуллай бур личIи-личIисса викторинарду, конкурсру, спортрал тIуркIурду ва цаймигу мюнпатсса давуртту.
Вай гьантрай лагерьданий хьунни Лакку мазрал кьини. Райондалул кказитрал корреспондент Арсен Аьбдуллаевлул бувсунни оьрчIахь лакку мазрай буклакисса республикалул даражалийсса «Илчи» ва райондалул «ЧаннацIуку» кказитирттая. Дурккунни цала назмурду. Бунни оьрчIащал лакку мазрацIун бавхIусса ва нукIу заманнул тIуркIурду. Оьрмулул бугьарасса, мяйва оьрчI ччаннай бацIан бувсса ПатIимат СутIаевал ккаккан дунни оьрчI кIанттуву бахIайсса аьдат. Яла цинявннан чIалай бунни щайини. Хъирив оьрчIан ккаккан дунни машгьурсса лакраясса фильм.
КIицI лаган, лагерьданий оьрчIан кIийлла дукра дуллай бур. НахIусса ва дахханасса дукра дан хIарачат буллай бур Зульфия Амирова ва Ххадижат Исяева.
Июньдалул 18-нний учительталгу, оьрчIругу бувкIунни Буттал кIанттул цIанийсса Хъунмасса дяъвилий жанну дуллуминнал гьайкалданучIан, дирхьунни тIутIив. Тарбиячитурал бувсунни оьрчIахь Ватан душманная дуручлай бивкIсса цала къучагътурая. Хаснува ЧIяйннал шяравасса Совет Союзрал Виричу ЦIаххай Маккаевлуя.
Укунсса гъинтнил лагерьдая хъунмасса мюнпат бур, каникуллайн бувксса оьрчIан ххуйсса дялахъру-дигьалагру хъанай дур.
Школалул директор хъунмасса хIарачат буллай бур лагерьданийсса чIун оьрчIан мюнпатну ва дакIний личIанну гьан. Рязину бур оьрчIал нину-ппугу.
Укун чичлай бур Москавлия лагерьдайсса оьрчIал нинухъру Ажитан АхIмадова ва Саида ХIанапиева.
Арулвагу барчаллагь
Лагерьданул зузалтран,
ОьрчIал нитти-буттахъул
Буру зуйн барчаллагьрай.
ЯлунчIингу бучIанссар
Рязисса оьрчIру зучIан,
Цинявппагу ххарину
Лагерьданий тIуркIу тIун.
Тарбиялул балгусса,
ЧIяйннал ххирасса школай,
Гъинтнил чаннасса гьантрай
Лагерь щурущи бувсса.
Барчаллагь зун хъунмасса
Лагерьданул зузалтран,
ОьрчIал нитти-буттахъал
Вихшала мяйжан дурсса!
На тарбия хьуссара
ЧIяйннал цIа дурк школалий,
Кулпатгу миккун гьан бав
Гъинттулсса лагерьданийн.
Тарбиячитал хъинсса,
Альбина бакIчи хьусса,
Барчаллагь зун хъунмасса,
Вай оьрчIру рязи бувсса!
Андриана Аьбдуллаева
