Дунияллул халкьуннал дянивсса, Аьрасатнал ва Китайнал билаятирттал цачIу дуллалисса «Глобал Азия 2025» конкурсрай цалчинсса даражалул диплом лавсунни Дагъусттаннал ва Аьрасатнал цIанихсса композитор Заурбаг Джанаевлул.
Лавайсса даражалул награда ванал лайкь дунни инструментирттал произведениялухлу. Конкурс сакин дурну дия Европанал культуралул ассоциациялул, Культуралул ва КIулшивуртту дулаврил профильный ва федерал министерстварттал кабакьулийну.
Ванил мурад бия гьунар бусса инсантал ялун личин баву ва гьарица чулуха миннал чIарав бацIаву, творчествалул потенциал хьхьичIунмай бансса шартIру дузал даву. Укун сий дусса конкурсрай жула дагъусттанчувнал, лаккучувнал цалчинсса кIану бугьаву – му хъунмасса ишри, ванал гьунарданулгу, ттизаманнул музыкалул культуралул ххуллий ванал бивхьусса захIматралгу барашинна дуллалиссар.
КIицI лаган, Заурбаг ГьунчIукьатIрал шяравасса аьлимчу ТIахIсиннул ва Ккурклиясса педагог Гулижаннул арсри. Ва ур Дагъусттаннал искусствалул лайкь хьусса ишккакку, Дагъусттаннал ПаччахIлугърал премиялул лауреат. Заурбаг Аьрасатнал Композитортурал союзрал Дагъусттаннал отделениялул жаваблувсса секретарьди, Дагъусттаннал Опералул ва балетрал театрданул директорнал хъиривчуври. Ххувшавугу барча дуллай, чIа тIий буру Заурбаглун культуралул ва искусствалул ххуллий чIярусса цаймигу хьхьичIуннайшивуртту ва тIайлабацIуртту.
Андриана Аьбдуллаева
