ХIурхIасса бущилий дунугу, цIу лаглай дур жулла шяраваллурду. Лаккуй ци-дунугу цIусса даву дуллалисса баяйхту, дакIгу ххари хъанан дикIай. Вана ттигъанну кIул хьунни ГьунчIукьатIув шяраваллил жагьилтурал сипталийну Хъамаллурансса къатри (Гостевой дом учару цIана жува ванийн) ва жяматрансса хIаммам (парной) буллай байбивхьушиву.

Уттигъанну шяраву хьунни ва иширацIун дархIусса ирглийсса субботник. Ца кьинилул дянив къачансса давуртту дуван хъирив лавунни жагьилтал. Магъи ларкьунни (дякъиягу дарщуну), левкьсса ца чIирагу цIунил бувну, вайми чIирттугу цIакь бунни, аьркин бакъасса чарттугу, аьрщигу дуккан дунни. ХIаммамрансса пач бишинсса кIану хIадур бунни. Пач цуппагу шяравасса жагьилнал цалла карунних бувну бур. Субботникрая махъ цинявппагу бавтIунни бикIайкунсса узбакIнал пулаврахун – ва бувну бия Наманган шагьрулия увкIсса хъамаличувнал-узбакIнал. Ссупралух хьунни гихуннай дуванмунил хIисав-сан дуллалисса, планну дичлачисса ихтилатругу.
Хъамаллурансса къаттагу, хIаммамгу буллай бур бухмур школа бивкIсса даралуву, захIматрал дарсру дихьлай бивкIсса къатраву.
– Шяраваллил жагьилтал гъан хьуна ттучIан, цан шяравалу цIу дуккан дуллансса давуртту дуллан ччай бур тIисса сипталущал. Ккаккан дував бухсса школалул агьаммур корпусрая личIину диркIсса къатрая лирчIсса эяллу, документирттал чулухагу, закондалуцIун бавхIусса цайми-цайми кIанттурдал чулухагу щаллушинна дан хьунсса кIану. Жагьилтал ххарину рязи хьу­нни. Гьарца шяраву бухьунссар, архну ялапар хъанахъисса, буттал шяраву къатри къалирчIсса, шяравун, бучIан ччай бунагу, бацIансса кIану бакъа ягу гъан-маччаминначIа бацIан намус хъанай, бучIан къахъанахъисса инсантал. Укунминнансса ва хъамаллурансса рахIатсса кIануну хьунссар тIиссара ва къатта, – тIий ур ГьунчIукьатIрал шяраваллил администратор МухIад Штанчаев.
ЦIанасса дирисса заманнай, кув тийх, кув шийх бусса чIумал, шяраву дуванмунил ялувсса икьраллугу, ихтилатругу, цайми щархъал кунма, гьунчIукьатIралгу хъунмурчIин шай ватсаправусса шяраваллил группалуву. Шяраву ци дуван, ци дакьин дан дурив ккарккун, дуллалимунин харжлугъран­сса арцу салкьи хьун, вайннал гьарца зуруй взносру дулайсса дур. Шиккува кIицI лаган, 2023-ку шинал январьдания шиннай шяраваллил жагьилтурал фондрал (чIарав оьрмулул хъунимигу бацIлай) дартIсса арцул ккал лархъун дур ца миллиондалийн (1 035 300 къуруш), вайннува аьркинмунин харж дурну дур 893 820 къуруш (ва зуруй харж дурсса 180 азарда къуруш къахIисавну). Ва мутталий дурну дур 5-ннияр ххишаласса субботникру. Шяраву цIана буллалисса Хъамаллурал къатлуцIун ва хIаммамрацIун дархIусса давурттал прорабну ур жагьилтурал ккурандалувасса МахIаммад-Амин Къушиев. ГьунчIукьатIрал хьхьичIунсса жагьилтуравасса ца, он-лайн кIулшивуртту дулаврил «Дом Знаний» цIанилусса школалул директор Халипа ТIагьировлул бувсмунийн бувну, объектрал хъунаману ивтсса МахIаммад-Аминнул, цувагу строитель ухьувкун, бувайсса бур аьркинсса стройматериалданул щаллушиндаралсса. Шикку ци захIматшивуртту хьунадакьлай дур тIисса суалданухьхьун МахIаммад-Амин укун тIий ур:
– Укунсса иширттаву ца кIицI лавгун, вама кьаитлан ччан къабикIай, мунияту укун учинна: жул группалуву къачан­сса бур къатри давриха зузисса пишакартал, мунияту хьхьичI бацIлацIисса масъалартту ща­ллу шай, шайнал шаймур дурну. Жул му хъунма группа бакъанугу, шиву буми бур взносирттайнугу, субботникирттайн бувкIун, давурттайнугу кумаг буллалисса. Къачансса бур, буттал кIанттуя архну ялапар хъанай буну, шяравун шинай цал бакъа бучIан къашайссагу, архния арцуйну кумаг буллалисса. Умуд бур жулла ккуран ялу-ялун хъунна хъананссар тIисса…
ЦIанасса чIумал шяраву ца цамургу ххаллилсса даву дуллай бур – футболданий буккайсса майдан. Ваниярив бусанну цамур чIумал.
Цалссарив, чIа учинну цалла шяраваллил хIакьинусса кьинилул ва гьунттий бучIанмунил ялув пикрилийсса жагьилтуран ва вайннацIун кабакьу буллалисса оьрмулул хъуниминнан тIайлабацIу.

Бадрижамал Аьлиева