Буттал кIанттул цIанийсса Хъунмасса дяъви байбивхьусса кьини ЦIуссалакрал райондалул жямат гьуртту хьунни «Свеча памяти» тIисса акциялий. Ва кьини ЦIуссалакрал райондалийсса ЦIуссалакрал шяравусса Буттал кIанттул цIаний жанну дуллуминнансса гьайкалданучIа лавхъунни аьпалул чирахъру.

Ванияр 84 шинал хьхьичI Ватан душманная дуручлай бивкIсса аьралийтал дакIнин бичин бувкIун бия райондалул Культуралул управлениялул зузалт, «Движение Первых» тIисса суккушиндарал активистътал ва шяраваллил жямат.
– Дяъви байбивхьусса 1941-ку шинал июнь зурул 22-чинсса кьини жула билаятрал тарихраву лухIи кьинину хьуссар. Ва кьини ссят 4 хьусса чIумал Германнал фашистътал ва миннал чул бувгьуми хар-хавар бакъа ххявхссар Совет билаятрайн. Дунияллул тарихраву та хьуссар яла чIявусса оь экьибувтIусса дяъвину. Ва байбивхьусса кьини жула халкьуннан тачIав хъамакъаритантIиссар, – увку­нни ЦIуссалакрал райондалул Культуралул къатлул хъунмур Башарат МухIадовал.
Ва кьини дакIнин бивчунни, дяъвилул майданнив жанну дуллуми бакъассагу, къинттуллух захIмат буллай бивкIмигу.

Имара Саидова