Аслансса арсру

ЦIансса хьхьу чанна дай цIарал
ламарал,
Миллатрал цIа гьаз дай ца виричунал:
Виричунал баймур инагу бунни,
Мукьардал шяраву лявхъу виричув.

Ав куна тивталсса, нигь-ццах дакъасса,
Къизгъинсса цIаравун ххяххан
хIадурсса…
ЦIимилул макь рутIлай дия тIар ссавгу,
ЧIутIул ккулла щуну ина агь чIумал.

Инава ккуллалул ивщуну уна,
Жандалул инава кьаитлай уна,
Мурад, вища бювхъур душмангу утан,
Уттуишин уван цала оьттувух.

Гьарцагу заманнай ас бусса арсру
ЯхIлувсса ниттихъал хъунигу бувссар.
Цими лухIи кьини дуркссар
халкьуннайн –
Ми лухIи кьинирду лархъссар
вирттаврал!

Му вил ччавур, Мурад, миллатрах
хьусса,
Вил чурххавун дурхсса ниттил
накIлищал,
Му вил чувшивугур ирсирай найсса,
ХIучI бакъа душманнал хьхьичIун
уккайсса!
Бахттун Гъазиева,
ш. ЧукIун

Аьзизсса ниттиха

Бурувгун буруганнин
Ларгун лякъай оьрчIшиву.
Яла махъ бувчIай жунма
Ниттил захIматрал кьадру.

Хъин итлай, хъуна уллай,
Ттун оь-хъин лахьхьин буллай,
Гьан бувссар ина оьрму
Ттуяту инсан уллай.

Агь, хъамабитайссарив,
Бавай, ттун ми вил яру,
На аьрххи-ххуллийн найни
Ттул хъирив хъювхъу тIисса.

Ттунмагу хавар бакъа,
Ларгунна, на кьаивтун,
КъакIулссия ттун, бавай,
Вакссава ятин хьунсса.

На хIатталлийн учIара,
Вил гьаттайн икрам бара:
Бавай, ттул аьзиз бавай,
Ттун вил лажин дур чIалай.

Дустал, уссурвал, ссурвал,
Ниттихъал кьадру бара,
Дакъассар дунияллий
Ниттил куннасса ччаву!
Салман Исмяилов,
ш. Гьуйми
Ххирасса ссил Муъминатлул аьпалун
Ссурвавраву чIиви ссуй,
Жул яла ххирамур ссуй,
Циван гъагъан дав ина
Вай жул ххарисса дакIру.

Агь, чанну дур утти жун
Чанипарсса вил симан.
Яруннал хьхьичI бур мудан
Хъяйнмасса ми вил яру.

Ххарину оьрму бутан
Бияв хIарачат буллай,
Къабивтунна, Муъминат,
Хъин къашай азарданул.

Ми вил лухIи жавгьарду,
Оьрмулул къабувччусса,
Буччинхьуви алжаннул,
Вила дакIнин лавхьхьусса.

Сяъдият Исмяилова,
ш. Гьуйми

Зунттаву цIусса къатри
Мустапа Къашкъаевлун

Буттахъал миналий, Шаллал шяраву,
Дурну дацIан дурсса вил цIусса къатри,
Чанна лахъан бувсса ца ттигу ужагъ –
Шяраваллин – авур, жяматран – эбрат.

Шалив аьрххи багьну, шяравун увкIнал
Бигьалаган бувкIсса вил оьрчIал-
оьрчIал,
Хъунмямма дакIниву яхъанантIиссар,
Ина був аманат буруччинтIиссар.

Аьдлулул полковник, Шаллал Мустапа,
Вин хъинмур чIа тIий бур вил
ихтивартал –
Яручу полковник Патааьлигу,
ЧIаххувчу, учитель
ЧIурттал ХIусайнгу.

Ява, тIивтIун бити хъунма дарваза,
Хъин хъамал, хъин дустал
хъамалу бухлан,
Вия эбрат ларсун, шагьрурдай шаллал
Щала щар цIунилгу цIукъатрал дуцIин.
ХIусайн Давидов,
ш. ЧIурттащи