Гъази-Гъумучиял оьрчIал библиотекалий хьунни Республикалул «Мой выбор» цIанилусса выставкалул лагрулийсса батIаву. Ва хъанахъиссар Республикалул Халкьуннал творчествалул къатлул ва Дуккаврил-методикалул центрданул хIадур дурсса, ца кIаная цамур кIанайн ласайсса выставка. Ва ишираву кабакьу буллалиссар муниципал сакиншиннардилгу.
Выставка дуллалиссар Дагъусттан Республикалул паччахIлугърал «Противодействие незаконному обороту наркотиков, профилактика наркомании, лечение и реабилитация наркозависимых» тIисса программа щаллу даврил 2025-ку шинал давурттал лагрулий. Проект щаллу дуллалиссар цIуллу-цIакьсса оьрму махъа нанисса никираву машгьур баву, жагьилтурал творчествалул луртанну хьхьичIуннай даву, рувхIаниймунил кьадру-кьимат лавай баву мурадрай.
Ва батIаврий гьуртту хьунни райондалул администрациялул бакIчинал хъиривчув Явсупи ХIамзаев, райондалул «ЦК, МП, Спорта, Туризма и ЦБС» МКУК-рал директор Ансар Къажлаев, Лакрал райондалул ЦБС-рал директор Мариян Аьшаева, балугъравун къабувхминнал инспектор Марат Ибрагьимов, райондалул хъунмур азарханалул медсестра ХIулаймат ДалхIатова.
БатIаву дачин дурну бия ОьрчIал библиотекалул хъунмур Зарема Исяева. Ихтилатру хьуна ттизаманнул ца яла цIюрувкьуми масъаларттавасса цану хъанахъисса, цIуллу-сагъшиврун, цалий бавцIусса оьрмулун, Аьрасатнал национал мюхчаншиврун хъуннасса нигьачIишиву дусса наркоманиялущалсса талатаврийн багьайсса. Шиная шинайн хъунна хьуну най дусса дур наркоманиялухун багьсса дуклаки оьрчIал ва студентътурал ккал, мукунна наркотикру ишла баву багьана хьуну оьрмулуцIа хьуминналмургу.
ОьрчIру укунсса давурттахух къалагавриву нитти-буттахь бур хъунмасса бияла: цалагу хIан къахIачIлай, пIапIрус къатIий, оьрчIащал цIуллу-цIакьсса оьрму бачин бувну ялапар хъанахъаву, оьрчIащал вихшалдарайсса ихтилатру буллалаву, аьркинний оьрчIан кьянкьану «къачча, къадуванна» учин лахьхьин баву.
Бадрижамал Аьлиева
