Уттигъанну, Аьрасатнал ПаччахIлугърал Думалул депутат Сайгидпаша Умахановлул сипталийн бувну, АьФ-лул ПаччахIлугърал Думалуву хьунни Дагъусттаннал миллатирттал мазру ва культура ядаврил масъаларттан хас бувсса ккуркки стол. Шикку гьуртту хьунни Аьрасатнал ПаччахIлугърал Думалул депутатътал, сенатортал, федерал ва регионнал структурардал зузалт, журналистътал, юристътал, Дагъусттаннал интеллигенция. Лакрал миллатрал вакилтуравух бия МахIачкъала шагьрулул 49-мур школалул директор Аьбдулкарим Айгунов ва Аьрасатнал лайкь хьусса тренер Муса Оьмаров. «Илчи» кказитрал ва ххуллухьсса бусравсса хъамалгу вай хьунни.
Хъамаллурал кIицI лавгунни, ккуркки столданул даврил агьаммур мурад ялун нанисса никиран ниттил маз, миллатрал тарих, багьу-бизу лахьхьин баву ва му ник Ватан ххирану тарбия даву хъанахъишиву. Миллатирттал мазурдил хIакъиравусса масъалартту, цинявппа цачIун хьуну, бавкьуну ххал бигьлагьавугу хъиндайдихьу хъанахъишиву.
– Заседаниялий хьусса ихтилатругу бия миллатирттал мазру бухлаган къабитансса чаранну лякъавриясса. Вай махъсса шиннардий ва масъалалия гъалгъа тIийнма бушиврулгу тасттикь буллай бур жула маз бухлагансса нигьачIаву душиву. БувчIлачIисса зат бур, мазурдийн биллалисса бала бацIан баншиврул, хьхьичIра-хьхьичI миннул хIакъиравусса закон кьамул дан аьркиншиву. Дуккаврил министерствартталгу школардай ниттил мазрал ОГЭ ва ЕГЭ дуллали бан аьркиншиву. Ниттил мазрал дарсру дихьлахьисса учительтуравун зунсса гъира-шавкь рутлан аьркиншиву. Цалва маз, тарих къаябувсса миллатрал бучIантIимургу бакъассар. Умуд бур кIицI лавгсса масъалартту дузрайн буккан бан ХIукуматралгу кабакьу банссар тIисса, – увкунни Муса Оьмаровлул.
– Дагъусттаннал миллатирттал мазру ххуй дакъасса тагьарданий бур. ЧIалачIисса куццуй, чIявуми мазру бухлагансса нигьачIаву дур. Му масъалагу хъунмурчIин щархъава шагьрурдайн бизаврицIун бавхIуну бур. Шилун бивзун махъгу цала-цала ужагъирттай ниттил маз ябаврих ургъил дуллай бакъар. Вай масъалартту ххал бигьаву ва мазру буруччаву мурадрайсса ххуллу-чаранну ляхълай бушиву хъунмасса зат бур. Умуд бур хьхьичIун лавсъсса масъалартту дузрайн буккан банссар тIисса. Ва хъуннасса даву цала бакIрайн ларсъсса Сайгидпаша Умахановлуща бюхъанссия мазрал ялувсса буруккинтту жула республикалий ххал бигьаврийну гьашиву дан. Ванал тIурча, цинявппа миллатирттал вакилталгу, цIанихсса аьлимталгу бавтIун, ххал бивгьунни мазру ябаврил, буруччаврил хIакъиравусса пикрирду. Заседание цурдагу сайки 6 ссятрал мутталий лахъи ларгуна, – тIий, буслай ур Аьбдулкарим.
Ванал мукунма кIицI лавгунни, школардай ниттил мазрал дарсру дишаврил масъала яла захIматмур бушиву.
Ниттил мазру ябаврил масъала ххал бивгьуну махъ, Сайгидпаша Умахановлул Аьбдулкарим МахIаммадовичлун ва Муса МухIуттиновичлун буллунни хасъсса аьралий операциялул гьурттучитуран чялишну кумаг баврихлусса Барчаллагьрал чагъарду.
Украиннал аьрщарай хасъсса аьралий операция байбивхьуния шинмай, аьралийтуран гуманитар кумаг буллай, чIарав бацIлай бур вай.
Аьбдулкарим гуманитар кумагращал мяйла лавгун ур хасъсса аьралий операциялул гьурттучитурачIан. Аьралийтуран хъунмасса кумаг бунни Муса Оьмаровлулгу. Вай кIиягу гуманитар кумагращал бивунни Луганскаллал Халкьуннал Республикалий, Курский ва Белгородский областирдай аьралий буржру бартбигьлагьисса «Каспий» батальондалул аьралийтурачIан.
ЗахIматсса кьини дурксса чIумалли халкьуннал яла ххуйми хасиятру (кьянкьашиву, яхI, ватандалийн тIайлашиву, иш багьний, кумаг бан хIадуршиву) ялун личайсса.
– Билаятрай захIматсса тагьар хIасул хьусса ппурттуву жула аьралийтал аякьалухгу, кумаграхгу мюхтажну бушиву бувчIлай бия. Жущава, тайннащал тихун лавгун, талан бюхълай бакъанавхьур, аьркинну бия аьралийтурал махъ жува бушиву ккаккан бан. Байбихьулий на уссияв КIулшивуртту дулаврил управлениялийхчIин кумаг буллай. Яла пикри хьуна, нава лавгун, жула аьралийталгу цукунсса, ци тагьарданий бурив ххал бансса. Цалчин лагайхтува тихсса гьалмахтал ттун уссурвал кунма хьуна. «Каспий» батальондалул аьралийтурал тIалавшиннарайн бувну, шартIру дакъасса кIанттурдай аьркин дайсса кьай-кьуй, медикаментру, дуки-хIачIия, тепловизорду, генераторду, газрай лахъайсса мюрщи пачру, газрал баллонну, чIиллу, рацияртту, маскировочный къертту ва дуклаки оьрчIал чивчусса чагъарду лавсун лагайссияв, – буслай ур Аьбдулкарим.
Аьралийтуран кумаг буллалисса чумартсса давурттахлу Аьбдулкарим цимилгу лайкь хьунни бусравсса наградарттан. Миннувух дур «За содействие в СВО» тIисса медаль, Республикалул бакIчи Сергей Меликовлул, ДР-лул миллатрал политикалул ва диннал иширттал министр Энрик Муслимовлул ва «Каспий» батальондалул чулухасса Барчаллагьрал чагъарду.
Аьралий операция нанисса кIанттурдайн гуманитар кумаг биян баврихлу уттигъанну Аьбдулкарим лайкь хьунни Луганск шагьрулул мэр Яна Пащенкол чулухасса Барчаллагьрал чагъарданун.
Аьбдулкарим школалул цIа-кьини бюхттул дан хIарачат буллалисса, унгу-унгусса педагоггу ур. ХIакьину ванал каялувшиву дуллалисса 49-мур школа республикалул хьхьичIунсса школардал сияхIрай бур. КIулшиву дулаврил даву лавайсса даражалий дачин дурсса, даврил сант кIулсса, зун гъира-шавкь дусса, жагьилсса пишакар Аьбдулкарим Айгунов буниялагу хъунмасса захIмат бихьлай ур, цIушиннарду дуллай, оьрчIан дуккаврихсса гъира бутлай.
Имара Саидова
