ЦIуминалийсса ЦIуссачIурттащиял шяраву лавайсса даражалий ларгунни 1-мур майрал байран.
ЦIуссачIурттащиял школалул чIаравсса майданнив бавтIун бия мухлукьат халкьуннал. Чялишну най бия маша-хаша. Архниява баллай бия балайрдал чIурду.
А. Аьбдуллаева
Байран лахъа-хъун дан бувкIун бия Дагъусттаннал эстрадалул балайчитал. Концерт хIадур дурну дия Новостройрал школардал дуклаки оьрчIал.
Ва кьини ЦIуссачIурттащиял шяраву най дия цамургу агьамсса мероприятие – «Лакку билаят» кубокрал завалунсса ттуплий буккаврил турнир. Бяст-ччал най бия финалданувун дагьсса командарттал дянив.
Ттуплий буккаврил турнирданий аьмну шаннагу лакрал райондалиясса 40 команда гьуртту хьуссар. Бяст-ччал къуртал хьуну махъ, миннул хIасиллу дуллалисса ихтилат бунни ЦIуссалакрал райондалул администрациялул бакIчи ХIажи Айдиевлул.
Ванал кIицI лавгунни, «Гъази-Гъумучи» тIисса лакрал жяматийсса фондрал сипталий сакин дурсса ва турнир хъуннасса агьамшиву дусса, шаннагу лакрал райондалул дянивсса дусшиву, цашиву цIакь даву мурадрайсса ххаллилсса даву хьушиву. ХIажи Айдиевлул барчаллагь увкунни турнирданий гьурттушинна дан бувкIминнахь, «Гъази-Гъумучи» фондрахь ва мунил председатель АьвдурахIим Дибировичлухь.
Бяст-ччаллал хIасиллайн бувну, турнирданий ххув хьуну, «Лакку билаят» кубок лайкь бунни Читтурдал шяравасса футболистурал командалул. Командалун, Кубок бакъассагу, дуллунни 100 азарда къуруш арцул, медаллу ва дипломру. КIилчинсса кIану бувгьунни Ялувмур ЧIатлухъиял шяравасса командалул. 3-мур кIану кIибавчIунни ЧIяйннал ва ЦIуссаккуллал шяравасса командарттал. Ххув хьуминнан бахшишру дуллунни бусравсса хъамаллурал: ДР-лул Халкьуннал Мажлисрал депутат Зайнуллагь Мирзоевлул, МахIачкъала шагьрулул Кировский райондалул администрациялул бакIчи СалихI Сагидовлул, Аьрасатнал правовой университетрал декан Амирхан Амирхановичлул.
Ахирданий ХIажи Айдиевлул барчаллагь увкунни ва турнир багьайсса даражалий тIайла дуккан хIарачат бувсса ЦIуссачIурттащиял шяраваллил администрациялул бакIчинал хъиривчу Юсуп Аьлиевлухь, ДЮСШ-лул директорнал хъиривчу ХIамид Нахаевлухь ва цинявппагу ва давриву гьурттушинна дурминнахь.
