Вай гьантрай лакрал миллатрал ялун хъуннасса кьурчIишиву дивунни. Ва тIабиаьт чантIа тIутIисса гъилисса интнил гьантрай, миллатгу ятин бувну, дунияллия лавгунни цинявппагу Дагъусттаннал халкьуннал ца яла ххирама балайчи Жамал Абакаров.

Жамал ия ляличIисса, щихакIуй къалавхьхьусса такьва дусса балайчи. Акъахьунссар мюрщиная хъунинайн бияннин ванал бивкIулул хавар къабювхсса.
Лавгунни Жамал оьрмулул дязаннив, цалва аьзизсса кулпатгу, дазу-зума дакъа ххирасса оьрчIругу, цинявппа цува ишин-итан кIану бакъа ххирасса тамашачиталгу кьабивтун.
Жамал дунияллия лавгсса гьант­рай акъахьунссия цаягу инсан ванал хъирив къааьтIутIисса, ванал бивкIу кьурчIи къабивзсса.
Апрель зурул 30-нний ЦIусса­лакрал райондалий хьунни Жамал Абакаровлул аьпалул вечер. Вечерданул сиптачи хьунни ЦIуссалакрал райондалул культуралул управление. Ва управлениялул хъунмур ХIабибат Буттаевал хъунмасса хIарачат бувну бия чIирисса чIумул мутталий, Жамаллул кулпатран кумаг баву, чIарав бацIаву мурадрай­сса, аьпалул вечер хIадургу дурну, лавайсса даражалий тIайла дуккан.
Вечерданий гьурттушинна дан бувкIун бия райондалул администрациялул бакIчи ХIажи Айдиев, ДР-лул Халкьуннал Мажлисрал депутат Зайнуллагь Мирзоев, ЦIуссалакрал райондалул жямат.
Жамал дакIнийн утлатисса вечерданий гьурттушинна дан ЦIуссалакрал райондалийн бувкIун бия ванал коллегахъул – Лакрал театрданул артистал ва Дагъусттаннал эстрадалул балайчитал.
Аьпалул вечер тIитIлай, ихтилат бунни ХIажи Айдиевлул.
— Жамал Абакаров, лакран акъа­ссагу, цинявппагу Дагъусттаннал халкьуннан ххирасса балайчи ия. Жамаллул концертирттай мудан ккуччу тIий бувцIуну бикIайва заллу. Ванал бивкIу кьувтIунни цинявн­нан. Вай гьантрайгу гьарица чулуха жуйн оьвтIисса, кьурчIишиву кIидачIлачIисса инсантал чIявусса бия. ДакIнийхтуну барчаллагь тIий ура ва Жамаллул аьпалун ду­ллалисса даврил чIарав бацIан бувкIминнахь, — увкунни райондалул бакIчинал.
Концертрал программа дайдирхьунни тамашачитуран нукIува ххира хьусса балайчи ХIабибат Буттаевал. СахIналийн балай учин бувксса артистал цинявппагу виримукьал буцIлай бия. Балайрду увкунни АхIмад Закариевлул, Аьйшат Айсаевал, Дагъусттаннал халкьуннал артисткахъул Луиза Шахдиловал ва Саният Рамазановал, Жамиля Аьбдуллаевал, Ямлихан ХIажиевлул, Аьбдул Мурадовлул, Написат Аьли­султановал, Мисиду Исяевал ва цайминнал. Артистурал балайрдал лях-карах итабакьлай бия тамашачитуран ххира хьусса Жамаллул балайрдугу. Концерт къуртал хьунни Жамаллул ниттихасса балайлийну. Ва балай тIутIиссаксса хIаллай залданувусса тамашачитал бивзун бавцIуну бия.
Жамаллул бивкIулул пашман бувсса инсантурал хIат-хIисав дакъая. Дагъусттаннал агьлу куннахь кув жижартту буллай, цалла кьурчIишиву кIидачIлай бия.

Аьли Абакаров, уссу:
ТачIав къаучинна акъассар куну,
Уздансса миллатрал цIа дурк
бюхттул арс.
ДакI къума къаданна,
макь къарутIланна,
Буссаксса дунъяллий ттул
миллат, ттул лак.

ЦIупар, чявхъа, замгьар,
буран бунугу,
Ина лахъайссия бюхттул
зунттурду.
Барзул хъару кунна,
каругу тIиртIун,
Гьава ба, лехлаху
барзунттал ялтту.

Дагъусттан аьрщарайх,
бюхттул зунттавух,
Мудан лехлантIиссар
вил балайлул чIу,
Вирттаврал балайрду
бухкъалагайссар,
Миллатрал оьттуву
сагъну бикIайссар.

ПатIимат Кьурбанова:
— Жамаллун дурагу 48 шин дия. Жамал ия Дагъусттаннал Владимир Высоцкий. Ва ия ляличIисса гьунарданулгу, хъинсса дакIнилгу заллу. Мудангу хIадурну икIайва мюхтажнан кумаг бан, чIарав ацIан. Ва махъва-махъсса ххуллийн тIайла уккан бувкIун бия азарахъул ванал пок­лонниктал, Дагъусттаннал циняв­ппагу миллатирттал вакилтал. Ванийнугу чIалай бия Жамал цинявппагу миллатирттан ххира­сса, бусравсса ивкIшиву.
Наргиз РахIимова:
— Левщунни лакрал чанна цIу­ку, дязаннив бяливчIунни лак­рал балай. Жамал, ина жун тачIав хъа­макъаитантIиссара. Вил балайрдан бивкIу бакъассар, ми сагъну бу­ссаксса сагъну уссара ина.
МахIач МахIаммадов:
— ХIайп, лавгунни дунияллия Жамал Абакаров. Мискин хьунни лакрал миллат ва хIакьсса лакку балай. Ванал цинявппагу балайртту бия дакIнива нанисса. Ва ия ляличIисса гьунарданул заллу. Ттизаманнул балайчитурал кунна, Жамаллул цалва балайрдай бизнес къадайва. Ванал дакIнийхтуну пишкаш байва ми цува ххира­сса халкьуннан. Миннангу мунаха чIалачIин да­къая. Цуксса кьурчIину дунияллия лаглай бур Жамал кунмасса, цал кIану бугьанма къаля­къинсса инсантал. Укунсса алмасру дунияллий нажагьри ляхъайсса.
МахIаммад Ссунгъуров:
— Лавгунни Жамал. Миллатрал яргсса цIуку пперхгу куну левщун лавгунни. Дазу-зума дакъа хъин­сса ия. Цайва рахIму къабайва. Ца лахIзалий чаннагу лавхъун, левщун лавгунни.
Жамал, цуксса ина ххирасса унугу, къавхьунни вин кумаг бан, ина уруччин. Ина язи бувгьунни яла чаннамур ххуллу. Мукунмур ххуллурив ччяни къуртал шай, цила гъилишиву цинявннан дуллай тIий. Аьпа баннав вил… Мудан дакIурдиву личIантIиссара, ххирама!
Саният Рамазанова:
— Ванал караматсса, чурххал базурдавух бюхлахисса чIу тачIав хъамакъабитантIиссар цал бунугу ванал балайлух вичIи дирхьу­сса инсаннан. ДакIниха лавхьхьу­сса балайрдугу бия. Цикссагу лавг­ссару архIал шагьрурдайх ва шяраваллавух гастроллайх. Ххуллий инсан хъиннува кIул шай. Жамал ия аьчухсса, дакI хъинсса, бургъия кунма чани, гъилишиву нанисса. Иминну пишгу тIий, муситал тIий акъа зума къаахъайссия. Инагу, вил караматсса чIугу тачIав хъамакъабитанссар. Циксса ххуллурду бивтссар, циксса балайрду увкуссар, циксса къаувкунма ливчIссар. Бунагьирттал аьпа баннав, махъминнал оьрмурду лахъи баннав, Жамал. ЦукунчIав вих хьун ччай бакъар ина акъашиврийн.
А. Аьбдуллаева,
И. Саидова