Щардал шяраву кIира кьинисса субботник хьунни

fto_11Апрельданий Лакрал райондалий Щардал шяраву хьунни хъунна­сса, 2 кьинилул манзил бувгьусса субботник. Му субботник цурдагу, школалул личIину, шяраваллил личIину дакъаяча, оьрмулул чIумух къабурувгун, цинявппагу инсантал , щалвавагу жямат хIала бувхсса дия.

Субботник дуллалисса кьинигу дия буниялагу дикIан аьркинсса куццуйсса интнил ххаллилсса кьини. Аллагьнащал маслихIат ккавксса хханссия жяматрал, даврицIун бавкьусса гьава тIалав бан. Чаннану гъилину бивтун бия баргъ. Дахьра аьрщарава чантI тIутIисса уртту-тIутIул кьункьал зузиминнал дакIурдиву ххарисса асарду чантI учин буллай бия ва хъиннува даврихсса гъира лахъ буллай бия.
ОьрчIал школалул хIаятраву бувгьуна мурхьру, школалул ахъу­ву, хIаятраву ва лагма-ялттусса кIанттурдай дурна марцIшиву, лази-лакьишинна.
Шяраваллил бакIчи Ибрагьимов Мирослав Ибрагьимовичгу ия цалвамур чулухасса кушу бачин буллай. Шяраву буссар буллай байбивхьуну ттуплий буккансса ва оьрчIру бялахъансса майдан. М. Ибрагьимовлул субботник даврил мурадгу бия га майданналул лагма мурхьру бугьаву ва, ми ризкьилул къабуканшиврул, миннул лагмара чапаргу даву. БувчIлай бур му цаннащагу-кIиннащагу дан шайсса даву дакъашиву. Мунияту, шяраваллил чIарав бацIан, субботникран кумаг бан бувкIун бия шяравату лавгсса, шагьрулий зузисса, дуклакисса жагьилтал. Барчаллагь вайннан хъунмасса. Зул оьрму тIутIайх бичиннав!
Зузиминнаха аякьа къадавугу ххуйсса иш бакъар. Хъами-душварангу ччан бивкIуна цалламур гьурттушиннагу дан. Даву дан хIала буххан битлай бакъахьувкун цивппа, вайнналгу, цайвамур бан, дурна ахттайнссаннун дукрарду. Дирзун дия самовар, мякь хьуманал чяй хIачIаван. Зузалт дукра канай бунува, хъами-душварал бувгьуна цанмасса ца-ца мурхьгу.
Укун тяхъану, ххуйну ларгуна вай кIирагу кьини.
Диана Оьмарова, ш. Щар