Ва итникьини МахIачкъалалив, Дусшиврул къатлуву, СВО-лул Вирттаврал суратирттал выставкалущал архIал «Время выбрало их» тIисса луттирал презентациягу хьунни.

«Дагъусттан» тIисса издательствалул итабавкьусса, СВО-лул Вирттаврая бусласисса луттирал автор бур «Дагъусттаннал правда» кказитрал журналист-публицист Сабина Исрапилова. Суратирттал автор ур художник Михаил Чернов. Ва цувагу творчествалул пишалия архсса инсан ур, инженер-авиаконструктор ва газрал даврил пишакар. Амма, цала тIийкун, суратру дихьлай ур дакIнил тIалавшиндарайн бувну. Ватандалухсса ччаврил ва чувшиврул бияла хъунмасса бушиву ккаккан буллалисса давриву цалвамур бутIа бишин.
– Жун жула дардирал, къювулул чIарав бацIлацIими бушиву асар къавхьуну къабикIайссар, барчаллагьрай бура художникнайн ттулама арснал суратрахлу. Цуксса дакI къума лаглай духьурчагу, суратрах буруглай, ва сурат дакIнил щавулий дирхьусса ка куннассар, – тIий бур Ккуллал шяраватусса Шамсият Оьмарова, арснал МахIмуд Чаннановлул суратрайхгу ках тIий.
Выставкалун ва презентациялун лахъсса кьимат бишлаши­сса ихтилатру бунни Дагъусттаннал Жяматийсса палаталул хъунама Аьзизбек Черкесовлул, республикалул Хъаннил союзрал хъунмур Интизар Мамутаевал ва «Дагправдалул» хъунмур редактор Бурлият Токболатовал. Вайннал кIицI лавгунни СВО-лул Вирттаврал аьпа уттава буллалисса творчествалул давурттахь бияла хъунмасса бушиву ялун нанисса ник тарбия дувавриву.
Сабина Исрапилова гьашину лайкь хьуссар Дагъусттаннал профессионал журналистътурал яла лараймур наградалун – «Мусил кьаландалун». Хасну ттун ттунмагу ххирар ванил чивчумур ккалан. Гьунар бусса бушивруцIун, Сабина гьарца ххуттаву дакI дирхьуну чичлачисса буну тIий.
– Сабина, мяйжаннугу, СВО-лул гьурттучитурал цума-цанналгу кьадар цила къюкIливух буккан байсса, гьарца ниттил дард цилламурну кьамул дайсса инсан бур, луттиравугу мукун бушиву чIалай бур. Къювурдуми хIат-хIисав дакъасса дия, Сабина, къашай хъанай, азарханардайн багьлай бия. Амма даву къакьариртуна. Ца ппурттуву ванил увкуна: «Гьамин, ттун ина чивчуну ччай бур ттула арсная тIисса ниттил дакIнийн щун бансса чара бакъассар» куну. Ниттил дакIнил къюву цуксса куртIссарив ванил цилвамур оьрмулувугу кIул хьун багьну тIийгу», – тIий бур шаэр, психолог, Аьрасатнал Ниттихъал союзрал Буйнакскаллал шагьрулул отделениялул хъунмур Аьйшат Расулова.
Сабина барчаллагьрай бур проектрал чIарав бавцIу­цириннайн, вайннавух Дагъустта­ннал Халкьуннал Мажлисрал депутат ХIасан ХIусмановлуйнгу. Ялун ххи банна, суратирттал ва луттирал автортурал давуртту дюрхъусса художникгу, публицистгу, гьамин, кIиягу инсан, дакIурдих зузисса буну тIийгур.

ПатIимат Рамазанова