Билаятрай Аьпалул ва хажалатрал кьини кIицI лаглагисса ппурттуву МахIачкъалалив «Аьрасат – ттул тарихри» музейраву хьунни ДР-лул Халкьу­ннал Мажлисрал сипталийн бувсса «Помним, гордимся и чтим» тIисса цIанилусса форум.
Шикку гьуртту хьунни ДР-лул Халкьуннал Мажлисрал председатель Заур Аскандаров, Дагъусттаннал парламентрал цалчинма вице-спикер Юрий Левицкий, спикер Камил Давдиев, ДР-лул Халкьуннал Мажлисрал депутатътал, ДР-лул Жяматийсса палаталул, властьрал органнал, ДР-лул Халкьуннал МажлисрачIасса Жагьилтурал парламентрал вакилтал, СВО-лул гьурттучитал ва цаймигу.
Музейрал жанахIраву тIиртIуну дия Хъун дяъвилул тарихран хас дурсса выставка.
Мажлис тIитIлай, Заур Аскандаровлул баян бувна жула тархъаншиврул цIаний жанну дуллуминнал аьпалунсса минутIрайсса пахъ багьаву.
– Билаятрал тарихраву яла пашманмур кьинилун ккаллину дур Совет хIукуматрайн хар-хавар бакъа фашист Германия ххявхсса июнь зурул 22-чинсса кьини. Фашизмалияту дуниял ххассал дуллай, Бюхттул­сса Ххувшаву ласлай бивкIсса жула аьралуннал ккаккан дурссар хIат-хIисав дакъасса къучагъшивуртту. Жула халкьуннал яхIлийну, къириятрайну, виричушиврийну ух ан бювхъуссар аскисса душман. Жува тай вир­тталсса ппухълуннал варисталлу. Махъ бакъа, хIакьину Украиннал аьрщарай нанисса хасъсса аьралий операциялул иширттавугу ххувшаву ласунтIиссагу журар, – ванал.
Бюхттулсса Ххувшаву гъан дуллай хъунмасса бутIа бивхьуссар жула инсантурал. Уттигу, ва бигьа дакъасса чIумал, Дагъусттан ккаллину бур СВО-лийсса аьралийтуран ца яла хьхьичIунну кумаг буллалисса региондалун.
Хъун дяъвилул шиннардий дагъусттанлувтурал хIарачатрайн бувну билаятрал обороналул фондран кумагран 1 миллиард арцул бавтIун бивкIссар. Дагъусттанная къинттуллухсса давурттайн тIайла увккун ивкIссар 150 азара инсан. Вайннал хIарачатрайну дурну диркIссар 700 километралул манзилданийхсса душма­нная буруччинсса мюхчаншивуртту, 15 оператив аэродром, бакьин бувну ва цIуницIакул був­ссар цикссагу ххуллурду. Цала жаннай къааьтIий, хьхьуния кьини дурну, захIмат буллай бивкIссар цинявппагу жула халкь.
Буттал КIанттул цIанийсса Хъун дяъвилий жанну дуллуми дакIнийн бичлачисса, миннал къучагъшивуртту абад дуллалисса ихтилатру бунни форумрал модератор Ханжан Кьурбановлул, Щалагу Аьрасатнал дяъвилул, захIматрал ветерантурал жяматийсса идаралул жула региондалийсса отделениялул председатель МахIарам Аьлиджановлул, «Память гор» фондрал директор МахIач Шамиловлул, хасъсса аьралий операциялий чувшиврий жа­нну дуллусса вирттаврал ниттихъал ва гъан-маччаминнал «Сила матерей» ккурандалул гьану бивзсса Мехрибан Муслимовал.
МахIарам Аьлиджановлул Заур Аскандаровлун дуллу­нни, ялун нанисса ник Ватан ххирану тарбия даврил, тарихрал ва культуралул ирс буруччаврил цIаний бивхьусса захIматрахлу, «80 лет Великой Победы» тIисса медаль.
– Ватан ххирашиву, иш багьний му дуруччин хIадуршиву хъанахъи­ссар жула бучIантIимунил яла цIакьсса гьануну. Ванил агьамшиву хъиннура асар хъанай дур хIакьину, хасъсса аьралий операция нанисса чIумал, жула тарих баххана бан, Хъун дяъвилул фашистътал хъин чулий ккаккан, дунияллул сообщество цала тIутIимунийх дачин дан кьаст лахIлахIисса чIумал, – увкунни МахIарам Аьлиджановлул.

Имара Саидова