Ларгсса нюжмардий МахIачкъалаллал музейраву хьунни «Дагестан в почтовой открытке. Конец ХIХ – начало ХХ вв.» тIисса цIанилусса выставка тIитIлатIисса шадлугъ.

Шикку махъру лавхъунни шагьрулийсса цайми музейрдал каялувчитурал, искусствоведтурал ва тарихчитурал.
Выставкалий дур МахIачкъалаллал музейрал салкьишиндаравасса ва таксса инсантал заллусса коллекциярттавасса 140-нния лирчусса открыткартту ва чагъарду. Вай дурккун дур ХIХ ттуршукулул ахирданий, ХХ дайдихьулий, вайннуй бур Дагъусттаннал областьрал шагьрурду ва шяраваллу, мукунма Дагъусттаннавун махъ-махъ бувхсса Къизлар шагьру чIалачIи бувну. Къачанни шикку, чIярусса шинну ларгун, шагьрурдал ва лагма-ялттусса кIанттурдал диц-куц цукссагу даххана хьуну дунугу, бургайхтува, открыткалул лувсса чичру дуккиннинма бувчIлачIисса кIичIиртту, масалдаран, МахIачкъалаливсса цIанасса Буйнакскийл, хьхьичIвасса Барятинскийл кIичIиравалу, Щурагьсса Ялувмур бульвар ягу Щурагьиял лахъазан. Выставкалийсса яла хьхьичIарамур открытка дур 1902-ку шиналсса – Ккавкказнаву яла лахъмунин ккаллисса Куруш шяраваллил сурат дусса.
Выставкалий мукунма бур архивравасса документругу, бух­сса кказитирттал ва луттирдал лажинтругу.
Дагъусттаннал лавгмуния почталул открыткарттай бусласисса выставка дикIантIиссар августрал 31-ннийнин.
Бадрижамал Аьлиева