Вай назмурдал ххару чивчуну бур Хъун дяъвилул гьурттучи, ЧIяйннал шяраватусса Рамазанов АбутIалиблул цува аьпалухьхьун гьан кIива зурул хьхьичI. Цала битавсса хъазамраву ванал 67 шинал мутталий лавсун занай ивкIун ур душманнал ккулла. Ванайн бунияласса щаву дирну диркIун дур Украиннай, Веница шагьрулучIа, 1942-кусса шинал. АбутIалиб лавгун ур дунияллияту 2009-кусса шинал оьрмулул 91 шинаву. Цал бунагьирттал аьпа баннав. Аьпа абад баннав Ххувшаву гъан дуллай бивкIсса цинявнналвагу.
* * *
Дия гъи дайдирхьун
Цалчинсса кьини,
Дунъяллий гьарца зат
ТIутIайх дирчусса,
Шагьрурдай, щархъаву
Циняв агьали
Дусшиврий, хъиншиврий
Яхъанахъисса.
Му кьини цIан-чаннахь
Немецнал аьрал
Жула ялун ххявхссар
Хар-хавар бакъа,
Ца зурул мутталий
Москавгу лавсун,
Совет паччахIлугърал
Ахир данну тIий.
Миллионнай аьрал
Аьрайн бивчуну,
Гьаваллавух, кьирийх
Бивгьун бавчуссар,
Шагьрурду ппив буллай,
Щархъурду ччучлай,
Миккусса агьали
Ясирну буцлай.
Дирирсса хъус-кьини
Хъямала дуллай,
Фашистал гъан хьуссар
МоскавуллачIан.
Амма къабювхъуссар
Хъуншагьру ласун.
Мукьра шин ва дачIи
Дяъви най хьуссар.
Къавхьуссар бух буван
Совет агьали.
Москавуллал хьулух,
Ккавкказ зунттаву,
СталингарадрачIа,
Курскаллал дазуй
КьатI бувссар фашистал,
БакI гьаз къаданну.
Лихълахъигу бувссар
Баргъ лагай чулийн
Асланталлу тIисса
Немецнал полкру.
Ришлай бачин бувссар
Европанавух
Дунъял ласунну тIий
Най бивкIсса аьрал!
Ник рищунгу бувссар
Берлин шагьрулий!
АбутIалиб Рамазанов,
ш. ЧIяйми. 2009 ш.
