Хъунполитикалувун хIала бухлан къаччиссия. Амма хIала къабувххун бацIангу къашай. Инсаннахха! Ларгсса нюжмаркьини Израильнал кIюрххила Ираннайн ттупру бивчунни.
ООН-далул вакилтал Израильнай аьйрду дуллай буккантIиссарив? Бувкрив? Ттупру бичаву вахIшишивур, оьхIалшивур тIисса мяъна-мурадрайсса гъалгъарду бан анавар бувкрив дунияллул лидертал? Ягу Израильнахь дуссарив ччан бивкIмур буллансса ихтияр? Дунияллул паччахIтал, аьр-курш мийрив? Баян буврив миннан санкциярду? Брендирттал заллухъру сукку хьурив тийхсса цалла предприятияртту, фирмарду лакьлай?
Рязира. Ядерный ракетардая нигь дур цинявннан. Миннул мархьгу, хьхьуригу бакIгу бакъасса, дакIгу дакъасса хъунаманахьхьун дириярча, ахирзаман бивзссаннун ккаллиссар. Амма, Израильнан бучIисса, Ираннан къабучIиссарив ядерный программардаха зун? «Превентив» методрур, ядерный объектирдайнни, ракетарттал базардайнни ттупру бивчусса тIий бур Израильнал армиялул хъуними, цайра аьй къалачIун. Жунма ккавккунни Ираннал бунагь бакъасса цикссагу оьрчIру ливтIушиву. ОьрчIрурив радикалтал? Ядерный программалущал мюрщисса оьрчIал ци ишри?
Тегеранналгу жавабран ттупал цIу дирхьунни. ЛивтIунни тахсир бакъасса агьлу та чулухгу. Гьай-гьай, дяъви мудангу оьттур, макьри, къювур. Ттупал ххит дурсса эяллалу личIангу, ивчIангу ччисса цучIав къаикIайссар. Иранналма икIу, Израильналма икIу.
БувчIлай бур ттунгу Израильнал хъуниминнал гьанумур мурад бушиву, Ираннал хъуними баххана бувну, гъургъазарду дурну, цанна ччикунсса (тIайланурив, цайнна мютIисса!) власть дишаву. Диктатортал ттунмагу къачча. Амма диктатор аххана увансса кьасттирайсса давур тIутIиминнацIунгу бакьин къахьунссар. Палестиннавусса геноцид дакIнийну. Бусурман агьулданийсса цайми-цаймигу зулмурду дакIнийну. ДакIнийн бутанну тIутIайх бивчуну най бивкIсса билаятру Сирия, Ливан. На тачIав Ираннавун лавгсса, бивсса инсан бакъара. Бивми буслайгу, чичлайгу бур Ираннал билаятрай ххуйсса оьрму бушиву, экономика сантирай ва лябуккулий хьхьичIуннай хьуну най душиву. Израильгу мукунма медицина, гьарзат лахъсса даражалийн гьаз дурсса билаят бушиву. Амма, къутай къарчигъай кунма, къутIгу бивкIун, цайми билаятирттангу, агьалинангу аждагьану къуццу тIутIавугу къаххуйри. Цивппа тахлий, махъми щяв, аьрщараву ччай.
Паракьатсса, ххуйсса оьрмулул хъирив Израильнавун лавгсса художник (ва Гъумукунгу ивссар, Гъумучиял мизитрал суратгу дурссар) чичлай ур цала телеграм-каналданий: «Цакуну ттуруллив дурккунни, ларчIунни чявхъа хIаласса гъаралгу, гужну къув-аьс тIун диркIунни. ДакIмур къув-аьслия ххари хъанай дур, ва битлатисса ттупал чIурду бакъача, тIабиаьтрал иш бунутIий. Израильнавусса цIусса хавардал биян бувсса асардава уккан увану, дакIнийн багьунни къув-аьслил чIурдаха лавхьхьусса ттупал ва ракетардал чIурду. Лавхьхьусса бухьурчагу, цал баярчагу, вай чIурду цукунчIав хъамагукъабитантIиссар, бусса оьрмулий я винма, я цайминнан вай чIурду цIуницIа къабавния тIунтIиссара.
ТIабиаьтралмур цIупардания, параннарая, къув-аьслия ина ххари хъанайра усса, шанугу ххуйну биянссархха тIисса умудрай».
ПатIимат Рамазанова
