Шарип Шарипов: «Жу хIадурссару аьрщараха зун ччиминнал чIарав бацIан»
Июньдалул 10-11-нний Минеральные Воды шагьрулий хьусса дунияллул халкьуннал дянивсса «Сады России-2025» форумрай-выставкалий гьуртту хьуну зана хьунни Дагъусттан Республикалул шяраваллил хозяйствалул министрнал цалчинма хъиривчув Шарип Шарипов бакIчисса делегация. Шарип Исмяиловичлущалсса жул хъун бакъасса ихтилатгу ва аьрххилиясса хьунни.
– Ва ххуллухьмур форум арулчинмур хъанай бия. Жулла республикалул багъманчитал мудангу гьуртту шайссар ваний, хьунабакьайссар хьхьичIунсса экспертътуращал, цIу-цIусса оборудованиялул ва технологиярттал жува щаллу буллалиминнащал. Багъру баву жучIара анаварсса бущилий хьхьичIуннай най душиврувугу къачIивисса бияла буссар жулва багъманчитал, уку-укунсса форумирттайн, выставкарттайн биллай, цIу-цIусса технологияртту лахьлай, цIу-цIусса кьутIирду чичлай бушиврул, хъуни-хъунисса ишбажаранчитуращал хьунабакьлай бушиврул.
Ва ххуллухьсса делегациялуву буссия республикалул сайки 50-ннийн дирсса багъирдал хозяйстварттал каялувчитал ва пишакартал, аьлимтал, Дагъусттаннал Багъманчитурал союзрал председатель Саадулла Урусханов, Гумбетуллал ва Сергокъалаллал районнал шяраваллил хозяйствалул управлениярттал начальниктал МахIаммад АьбдулхIалимов ва Руслан ХIамидов. Муданма кунма, форумрайн щалвагу билаятрая бувкIун бия багъирдансса оборудованиялуха, оьргъашивурттаха зузисса язими экспертътал ва компанияртту. Форум-выставка нанисса шанмагу гьантта хьунни, даврил опыт кIибачIаврил бикIу, цайми-цайми кIанттурдал бикIу, хъинну авадансса. Форумрал лагрулий хьунни Аьрасатнал шяраваллил хозяйствалул министрнал хъиривчув Андрей Разиннул каялувшиндарайсса совещание. Ваний гьуртту хъанахъиминнавух бия Ставрополлал улклул губернатор Владимир Владимиров, Къарачай-Чаргаснал Республикалул бакIчи Рашид Темрезов, СКФО-рал регионнал шяраваллил хозяйствалул министртал, – буслай ур Шарип Исмяилович.
Жулла республика багъирдал чулуха Аьрасатнаву лидертуравух дусса дур, жучIара багъирдал 30 азарда гектар дусса дур, вайннувагу 23 азарда – ахъулсса дуллалисса мурхьирдал. Ларгсса 2024-ку шинал жучIара дартIун дур ахъулссаннул ва хIаллил ахъулссаннул (ягоды) 260 азарда тонна, ва Аьрасатнаву шамилчинсса кIану хъанахъиссар. Махъсса ппурттуву багъру буллалаву жучIара хъинну щириркIуну дур, багъирдахьхьун жучIара сайки 4 700 гектар дуллуну дусса дур. Бургъил, гъилишиврул чулуха тIабиаьт мяш дакъасса Дагъусттаннай хьуми ахъулссагу цайми кIанттурдайнияр нахIусса дусса дур.
– Жулла ахъулссаннуя тIурчаннив, вайннул ляличIиссава тIин-тIааьн буссар, экологиялул марцIшиврул чулуха вай ххишала дакъа ларайссар. ЖучIара баргъ бивтсса кьинирду чIяруссар. Дагъусттаннай личIиссава кIану бугьлагьиссар хъувардал (косточковый) культуралул: ахъвазан, цIулит, кякан, бяъли, ккурмуз (алыча). Хъувардал культурардайн бувну жува 1-мур кIанай буссару. Шикку жулва потенциалгу хъунмассар, жулла ххаллилсса ва цIакь хьусса аьдатругу дуссар. Аьрасатнал цайми регионнай жулла лавайсса даражалул ахъулссаннух ялугьлай бикIайссар.
«Сады России» журалул форумирттай ларсъсса цIусса кIулшивурттугу ишла дуллай Дагъусттаннал аьрщарай, дурсса консультациярттугу хIисаврайн ларсун, багъманчитуран кумаг буллай бачинтIиссару гихунмайгу. Жу хIадурссару аьрщараха зун ччиминнал чIарав бацIлан, – тIий ур Шарип Исмяилович.
Бадрижамал Аьлиева
