Июньдалул 11-нний хьунни ДР-лул энергетикалул ва ЖКХ-лул министр Марат Шихаьлиевлул пресс-конференция. Муний министрнал бувсунни гьашину июльданул 1-нния тинмай ЖКХ-лул хIаллихшиннахсса тарифру (багьри) лахъ буллалишиврул хIакъираву.
Хьунабакьаврий гьуртту хьунни мукунма министрнал хъиривчу ХIусман АхIмадов ва Министерствалул тарифиртталсса баврил управлениялул хъунама Мурад Нажуев.
Энергетикалул министрнал бувчIин бунни коммунал хIаллихшиннахсса тарифру циван ва цукун баххана буллалиссарив. Ванал тIимунийну, му дур закондалул ккаккан дурсса, гьар шинах тарифирттал компаниялул лагрулий дувайсса даву. Му дайссар хIаллихшиннал дузал байсса идарартту цила чIумал арцул щаллу баву мурадрай. 2024 шинал регулятор идаралул ккаккан бувну бур сайки 1300 тариф. Миннуясса мюнпат хьуну бур 12 млрд къуруш.
2025 шинал июльданул 1-нния тинмай Дагъусттаннай зунтIий бур укунсса тарифру:
электроэнергиялух – 3,94 къуруш (уттинин – 3,51 къуруш ца кВ.ч);
газрах – 8,21 къуруш (уттинин – 7,09 къуруш ца куб.м.).
Щинал дузал баврил ва щин дукьан даврил хIаллихшинну ва гъилишиврул дузал баврил хIаллихшин Дагъусттаннай дулайссар личIи-личIисса идарарттал, миннул тариф хIисав дайсса диркIссар республикалул гьарца шагьрулун личIи-личIину. МахIачкъалалив тарифру зунтIиссар укунсса дуциннайну:
щинал дузал баврих – 16.01 къуруш ца кубрах (уттинин 11,90 къуруш ца кубрах);
щин дукьан даврих – 7,9 къуруш (уттинин 5,87 къуруш ца куб м);
гъилишиву дулаврих – 2556,91 къуруш Гкал (уттинин 2115,07 къуруш Гкал).
Марат Шихаьлиевлул личIину бувсунни Агьалинан дифференцированный тарифру ккаккан баврил концепциялия. Миннул хъунмур принцип укунсса дур: цуксса чIявуну электроэнергия харж бувну бурив, мукссава хъун хьунтIий бур ца кВч-рахсса багьагу. Харж бувсса электроэнергиялух бурувгун ца кВч-рал багьа баххана хъанантIий бур 3,9 къурушраяту 8,6 къурушрайн биянцIа.
СМИ-лул вакилтуран кIул буван ччай бия, цуксса лахъ хьунтIий буссарив коммунал хIаллихшиннахлусса гьар зурухсса багьа. Министерствалул пишакартурал мисал бувцунни МахIачкъалалив 2 къатта бусса квартиралуву ялапар хъанахъисса 2 инсан усса кулпатрал цуксса багьа булун аьркинссарив. Агарда ва кулпатрал хьхьичIра коммунал хIаллихшиннахлу дулайсса диркIхьурча 3 азарда къурушраяр чансса ххишаласса арцу, утти гава багьа ххи хъанай бур 600 къурушрал.
Пресс-конференциялул ахирданий Марат Шихаьлиевлул бувсунни, коммунал хIаллихшиннахлусса тарифру лахъ хьурчагу, ми Дагъусттаннай личIлай бушиву СКФО-рал субъектирттайминнуяр ялавайну. Ванал оьвчаву дунни энергия ишла баврил кьяйдарду дуруччин ва газралгу, токралгу счетчикру дишин, ишла бувссаксса энергиялух хIакьсса багьри булаваншиврул.
ХIасан Аьдилов
