Укунсса цIанилусса концерт хьунни ларгсса нюжмардий МахIачкъалалив Яруссаннал театрданул хьхьичIсса майданнив. Ванийну дайдирхьунни Ххувшаврил 80 шинан хасну ду­ллалисса «Ватандалухлу!» («За Родину!») тIисса цIанилусса форум-фестиваль.

Ва хъанахъиссар «Культуралул ирс» фондрал Аьрасатнал культуралул фондрал «Семья» национал проектрал «Семейные ценности и инфраструктура культуры» тIисса федерал проектрал лагрулий ккаккан дур­сса грант ишла дурну щаллу дуллалисса фестиваль.
Сакиншиннарал, консультациялул ва информациялул чулухасса кумаг бувссар проектрал партнерталну хъанахъисса Дагъусттан Республикалул Культуралул министерствалул, Халкьуннал творчествалул къатлул ва МахIачкъала шагьрулул администрациялул Культуралул управлениялул.
Фестиваль даврил агьамми мурадруну хъанахъиссар Буттал кIанттул цIанийсса Хъунмасса дяъвилий совет халкьу­ннал дурсса виричувшивуртту хъамакъаритаву, музыкалийхчин ва балайрдайхчин никру цачIун даву.
Концертрал дайдихьу дуру­нни Дагъусттаннал опералул ва балетрал театрданул солист Сергей Поздняковлул «Поклонимся великим тем годам» тIисса балайлийну. Гихунмай сахIналия баллай бия талатавурттаву, цIу къизгъинний ва къинттуллух лявхъусса, билаятрал тарихрал бардултну хьусса балайрду. Вай щаллу буллай жулла республикалулми артистътуравух бия Ингушетиянавассагу, Ставрополлал крайраяссагу ва Ростовуллал областьраяссагу (ш. Азов).
Шиккура форумрал лагрулий тIиртIуну дия «Артель мастеров» цIанилусса выставка-ярмаркагу. Жулвами усттартурацIун шикку бия Алтайскаллал крайраясса, Ставрополлаясса ва Ингушетиянавасса усттарталгу.

* * *
Хъиривмур кьини, июньдалул 12-нний Аьрасатнал Кьинилун хасну ва «За Родину!» форум-фестивальданул лагрулий МахIачкъалалив хъун майданнив хьунни гала-концерт. Ванил дайдихьу дунни «Мы за мир!» тIисса цIанилусса патриот акциялул лагрулий ва «Вперед, Россия!» цIанилусса балайлухун Аьрасатнал паччахIлугърал ттугъ тIитIин баврийну.
Майданнив тIиртIуну дия «Аьрасатнал Вирттал» тIисса суратирттал выставкагу. Шикку ккаккиялун дирхьуну дия Хъун дяъвилул ветерантурал, СВО-рал гьурттучитурал 100 сурат.
Бадрижамал Аьлиева