Украиннал аьрщарай хасъсса аьралий операция байбивхьусса цалчинсса гьантрая шийнай Ватандалул мурадру буручлай ур Казбекуллал райондалийсса Дылым шяравасса Тагикуллагьлул арс МахIаммад МахIаммадов.
Буйнакск шагьрулийсса 136-мур гвардиялул мотострелковый бригадалуву медициналул комиссиягу бувну, ванахьхьун буллуну бур янна-ярагъ. ЧIивима сержант МахIаммад ивтун ур артиллериялул взводрал операторну.
МахIаммадлул хасъсса аьралий операциялул ххуллу байбивхьуну бур Запорожский областьрайсса Высотное тIисса поселокрая.
МахIаммад чIумуйнусса гьан увну ур медициналул роталул санитар-водительну. 2023 шинал январьданул 1-нний хIукму бувну бур вайннал рота Мирный тIисса поселокрайн гьан дувансса. Тиччагу цал Щербакилийн, яла Малые Щербакилийн тIайла бувккун бур. Поселокрайн бивсса кIул хьуннинма байбивхьуну бур вайннайн битлай, вайннал машиналийн пулеметрал цIу тIиртIуну дур. МахIаммадлуща ва ванал гьалмахтураща, машиналува бувккун, лабикIан бювхъуну бур. КIюрххил ссят 6-нний байбивхьуну, ахттайн ссят 12 хьуннин талатавуртту дачин дурну бивкIун бур украин аьралийтал. ХIатта та поселокрай бугьара­сса инсантал, хъами, оьрчIру бусса кIулну бунагу, къизгъинсса битавуртту дачин дурну бивкIун бур.
Та ппурттувусса талатавриву жулва «Тигр» бронемашиналува артиллериялул, пушкардал ва минометирттал ххуйсса жаваб дуллуну дур. КIивагу чулуха най диркIун дур оьсса талатавуртту. Штурмовиктуран ва пехоталун ци чулийгу махъунмай хьунсса чара къабивкIун бур.
МахIаммад хIаласса шама аьраличу усса группалун, талатавуртту нанисса кIанттурдая щавурду дирсса аьралийтал ххассал буллай, медициналул цалчинсса кумаг буллан багьлай бивкIун бур. Вайннал ххассал бувсса аьралийтал цамур группалун биян бан багьлай бивкIун бур госпитальлайн.
– Ва талатавриву ттула гьалмахтуращал ххассал увссия 92 аьраличу. Та цурдагу дия дяркъу дусса чIун. Учин бюхъанссар, хьхьу-кьини дакъа жула оьрчIру ххассал буллай бивкIру куну. Ттул яла ххаришиву дия ттущава аьралийтал ххассал бан бюхъаву, – буслай ур МахIаммад.
Шикку ккаккан дурсса къучагъшиврухлу МахIаммад лайкь хьуну ур «За спасение погибавших» тIисса медальданун.
– ОьрчIний ттун укунсса ишру ккаккайва кинордаву. ТачIав пикри къабагьайва навагу аьралий иширттавух гьуртту хьунссара тIисса. Пахрулий ура жула президент Владимир Путин кьянкьасса пикрирду, бювхъусса хIукмурду бан кIулсса ушиврия. Хасъсса аьралий операция баян буван цахъис чIал хьуссания, хIакьину жулва бухкIуллий оьсса ишру бикIантIиссия, – тIий ур ва.
Апрельданул 1-нний вайннал бригада тIайла бувккун бур Донецкалийн. Дайдирхьуну дур Авдеевкалул чулухуннайсса талатавуртту. Вайннал машина бита-ххитавурттахьхьун биривну бур. Вай ливчIун бур машина бакъа. Барчаллагьрай ур МахIаммад ва ишираву чIарав бавцIусса, УАЗ «Буханка» буллусса инсантурайн.
– Ца ппурттуву рациялувух позывной «Жгут» оьвтIун ивкIунни: «Зул ялтту дрон лехлай дур, мугъаятну бикIияра», — тIий. Руртунни гьаваллава цалчинмур граната, мунил жун зарал къабунни. КIилчинмур граната пIякь увкунни ттул чIарав, ттуща бювхъунни мунищагу ххассал хьун. Яла дайдирхьунни артиллериярттал битавур­тту. Му чIумал ттуйнгу щаву дируна. Командованиялун ччай бия на махъунай тIайла уккан. КIусса щавурду дирсса ттула гьалмахталгу кьабивтун, ттул дакIнил кьамул къабувна шавай зана хьун. Командирнал, ттул кагу дургьуну, увкуна: «Вин хъунмасса барчаллагь. Ина кунмаминнайнни Аьрасатнал бучIантIимур хъар хъанахъисса»,– куну.
МахIаммадлул бусаврийн бувну, хасъсса аьралий операциялий яла асар хьунмур бивкIун бур украиннал нацистътурал цала агьалийнайн битлан махъаллил бакъашиву.
Хасъсса аьралий операциялий аьралий бурж бартбигьлагьиссаксса хIаллай МахIаммадлул ва ванал гьалмахтурал ххассал увну ур щавурду дирсса 174 аьраличу. Ва къучагъшиврухлу МахIаммад лайкь хьуну ур Суворовлул медальданун.
Укун къучагъну аьралий бигьарду бартбигьлай бур хIакьину жула жагьилтал.
Имара Саидова