Июньдалул 16-нний Дагъусттаннал бакIчи Сергей Меликовлул ххал бунни Къумтуркъалаллал райондалий «Тюбе» индустриал паркирал аьрщарай буллалисса Озондалул склад. «Ромекс Групп» компаниялул президент Алексей Прокопенкол Сергей Меликовлухь бувсунни шикку дуллалисса давурттая.

ДакIнийн бутанну, республикалун агьамшиву дусса объект баврил хIакъиравусса рязишиву дурссар 2023 шинал Петербургуллал дунияллул халкьуннал дянивсса экономикалул форумрай.
Ва хъанахъиссар СКФО-лийсса Озондалул яла хъунмур склад. Шиккун харж дуван ккаккан дурну дур 9,6 млрд къуруш инвестициярттал, миннувату ттинин харж дурну дур 6,6 млрд къуруш.
Комплексраща бюхълай бур бартдигьин гьантлун 1000 машиналул аьркиншин ва щаллу дуван ттуршазардахъул заказру.
Строительствалул давурттай зий ивкIссар сайки 480 инсан. Компаниялул хIарачат бивкIссар бюхъайссаксса чIявуну давурттайн буцин кIанттул пишакартал.
Озон компания зий дайдишаврищал хIасул хьунтIий бур 2000 зузи кIану. Дагъусттаннай интернетраву маша бавуртту ва миннуясса налогру гьарза хьунтIий дур, региондалий логистикалул инфраструктура лядуккантIий дур.
КутIасса мутталий авлахърай дурну дур хъунисса къатри, коммуникацияртту ва цIусса ххуллу. ХIадур хъанай бур цалчинмур блок тIитIин, къуртал дурну дур виваллил давуртту. Дихьлай бур цIусса оборудование. Щала комплекс зий байбишинтIий бур 2027 шинал.
Проект бартдигьаврищал кIул хьуну махъ, Дагъусттаннал бакIчинал дунни совещание, муний къулагъас дурунни цIанасса масъалартту дузал баврих.
Сергей Меликовлул барчаллагь увкунни циняв уртакьтурахь хIала-гьурттуну зузаврихлу ва хъуннасса проект дузрайн дуккан давриву бивхьусса захIматрахлу.
– ДакI дарцIуну ура объект хъинну тIалавну бикIаншиврий. Жунна мунил агьамшиву хъуннассар, цанчирча му форматрайсса маша баву – му нагъдасса арцу дакъана хъуслих багьа булавур, мунийну региондалул налогирттал база лахъ хъанахъиссар, – увкунни региондалул бакIчинал.
ХIадур бувссар
ХI. Аьдиловлул