Вай гьантрай хасъсса аьралий операция нанисса кIанттурдая зана хьунни «Диалог» тIисса центрданул волонтертурал кьюкьлуву тихун гуманитар кумагращал лавгсса жула душру: «Диалог» центрданул каялувчи Зайнаб Рашидова, центрданул вакилтал Шахьуватусса Лида Кьурбанова ва ГьунчIукьатIатусса Саида Къушиева.
Вай бивунни Луганскаллал ва Донецкаллал Республикарттайн, Белгородскаллал областьрайн.
– Р. ХIамзатовлул цIанийсса Миллатрал библиотекалуву буссар къертту щашлашисса «Диалог» тIисса волонтертурал центрданул штаб. Ва тIивтIуния шинмай вайннал цикссагу маскировочный къертту ва гуманитар кумаг гьан бувссар аьрайн. Ттул шин хьунни шикку зий. Укунмасса площадка тIивтIуну буссара Лаккуйгу. Цаппара кьинирдай кIий, цаппара кьинирдай шилу зий бикIара. Хасъсса аьралий операциялий буссар жущал дахIаву дусса аьралийтал. Тайннахь ци аьркинну дурив цIухху-бусу бувну, жула щаршсса къертту (ва ххуллухь 180-нния лирчусса), цамур гуманитар кумаг (генераторду, кьаркьсса душ, рациярду, дука-хIачIанмур, виргъан-кIараллу, шанийх дихьулт) лавсун, ца хъунмасса машина бувцIуну, лавгру. Хьунабавкьуру Буйнакскалийсса 136-мур бригадалул аьралийтуращал.
Лак бурув, часса буру тIий, цIухху-бусу буллан бикIайссияв. Мукун кIул буллай, лякъав тийх ттула шяравучу. Ва ххал анна тIисса пикрилий, ванан цIа куну хIадур бувсса Лаккуясса ссайгъатгу буссия.
Мукунма хьунабавкьура ттула чIаххувчу, Дагъусттаннал муфтиятрал вакил МухIаммад Майрановлущал, Хан Башировлул гъанчувнащал (племянник). Ва Буйнакскалия лавгун ия хасъсса аьралий операциялийн. Ттун пикри бур вай тийх къуллугъ буллалисса жула оьрчIан хас бувсса музей бан Лаккуй. Шивун дуклаки оьрчIан экскурсиярду буллай, жула къучагътурая буслан. КIулну бикIувча ялун нанисса никирангу хьхьичI ххуттай бавцIуну билаятрал мурадру буручлачисса жула вирттаврая, – тIий, буслай бур Лида.
ЦIунилва-цIунил махIаттал буллай бура аьралуннал чIарав кьянкьану бавцIусса жула зунттал душваврал, хаснува ПартIу ПатIиман лайкьсса къучагъсса лаккудушваврал. Лидай, Саидай, барчаллагь зун хъунмасса чувшиврухлу, чумартшиврухлу. Зу бувмур АллагьначIагу кьамулну лякъиннав. Зу кунмасса ПартIу ПатIимахъул чIарав бусса аьрал бух бан къахьунтIиссар.
Андриана Аьбдуллаева
