Форум тIивтIунни июньдалул 19-нний, лахъи лаган тIий бур июньдалул 21-ннийнин. Ва хъанахъиссар 18-мур форум.

Дагъусттаннал делегациялул каялувчину ур Республикалул бакIчи Сергей Меликов. Ва хьунаакьинтIий ур Аьрасатнал цаппара министерстварттал ва идарарттал каялувчитуращал, миннувух – газрал дузал баврил ва цифровизациялул масъаларттал хIакъиравугу. Аьрасатнал цаппара регионнащал рязишиврул кьутIирду чичинтIий бур машлул ва экономикалул, элмулул ва техникалул, культуралул аралуву уртакьну зузаврил хIакъираву. Къулагъас дувантIий бур дунияллул халкьуннал дянивсса дахIавуртту дузал даврих, промышленность, культура ва спорт лядуккан даврих.
Дагъусттаннал бакIчи гьуртту хьунтIий ур «Общие ценности – основа роста в многополярном мире» цIанилусса форумрал пленар заседаниялий.
Дагъусттаннащал дахIаву дувансса гъира нахIакьдансса бакъар. Жула республикалул ларгсса шинал баян бувну бивкIссар 5 «прорывной» проект бартдигьлай бушиву, миннул багьа бур 548 млрд къуруш. Проектру бартдиргьуну махъ хIасул хьунтIий бур 21,7 азарва зузи кIану. ЦIана жучIара мукунсса проектру дур 6, инвестортураща бюхълай бур цивппа гьуртту хьунсса проектру язи дугьан.
Форумрая бусанну хъиривмур номерданий.