ЦIуминалийсса ЦIуссалакрал шяраву лахъа-хъунну кIицI ларгунни аьдатравун дагьсса ОьрчIру буруччаврил кьинилул байран. Ва байран шикку мудангу гурну, тяхъану лагай.
Шадлугърал мажлис хьунни Агьалий социал иширттал чулуха дузал баврил комплексный центрданул (КЦСОН) хIаятраву.

Ва духьунссар оьрчIан яла ххирамур байран. Хаснува ххарину бикIай оьрчIру вай гьантрай дуккаврил шин къуртал хъанай тIий.
Центрданул хIаят байрандалун лархьхьуну чIюлу дурну дия. Лахъну баллай бия оьрчIан ххирасса балайрду.

Шадлугърал мажлис тIитIлай, оьрчIру, нину-ппу ва Центрданул зузалт барча бунни КЦСОН-лул директорнал хъиривчу Аьбидат Аьбдуллаевал.
Хъирив байбивхьунни гурсса мажлис: тяхъасса тIуркIурду, личIи-личIисса бяст-ччаллу, ссигъри бувчIаву, фокусру.
Гьарица шинах кунма, акробатикалул ххаллилсса номерду ккаккан бунни ДЮСШ-рал гимнасткахъал.
Мажлис хъиннува ххуй бунни райондалул Культуралул управлениялул артистътурал. Мероприятиялул лагрулий хьунни творчествалул мастер-классругу. ОьрчIру гъирарай оьрчIи буллай бия гипсрал къалипру, дуллай бия хIазсса аппликацияртту.

ОьрчIру ва нину-ппу барчагу бувну, мероприятиялул сакиншинначитурахь барчаллагь увкунни КЦСОН-далул директор Малика Жамхатовал ва Балугъравун къабивсса оьрчIал иширттал ва миннал ихтиярду дуруччаврил комиссиялул хьхьичIунсса пишакар Лиана МаматIиевал.
Ва кьини оьрчIан дуллунни грамотартту ва призру, цинявппагу гьурттучитурайх дарчIунни нахIу-нацIурду.
Центрданул зузалтрал, гьар мудан кунна, оьрчIан дакIний личIансса ххаллилсса байран дунни.
КIицI лаган, ЦIуссалакрал райондалул КЦСОН-далул буссар ва байран лахъа-хъунну тIайла дуккан мудан кумаг байсса спонсортал, райондалул ишбажаранчитал.

Андриана Аьбдуллаева