ХIурмат бусса «Илчи» кказитрал редакцияй! На, Уруватусса Анисат Уцумиева, ялапар хъанай бура Сочилий. Ттун хъинну ххирар ва жула «Илчи» кказит, ванийхчин кIул шай Лакку билаятрай, ттула миллатрал дянив хъанахъимур. Ххари-ххуймуния дакIнийхтуну ххари шара, пашманмуния нагу къума лагара. На ссавур духларгун ялугьлай бикIара ирглийсса номер бияннин. Ванищал ттучIан бияй зунттал гьавагу, лакку билаятрайсса щаращал тIааьнсса жюржугу, уртту-тIутIал кьанкьгу.
Ттул цаппара макьаларттугу дуркссар кказитрай. ХьхьичIра, бюхъу-хъит ххишаласса чIумал, ччя-ччяни чичайссия. Барчаллагьрай бикIара гьарица шинах ттунна ва бахшиш дайсса маччадуш Наидайн. Ва МахIачкъалалив пучрал отделениялий операторну зий буссар. ДакI хъинсса, инсаннан хъинбала бан ччисса буссар. Ва ттула маччадушнищал хьусса ца иширая чичлай бура ва макьалалуву.
Мадара шиннардил хьхьичI пучрал отделениялий ца чIавахьулттичIан гъан хьуну ур лахъсса, лазиларкьуну лархсса, ккаккангу ххуйсса жагьилсса адамина. ЦIувххуну бур цала цIаний арцу дучIан аьркинссияхха, дурив ми дуркIсса извещение куну. Ва ивкIун ур Ххутрал шяравасса цIанихсса хирург, Дагъусттаннал Медициналул институтрал хирургиялул кафедралий каялувшиву дуллалисса Дибир Аьбдуллаевич. Наидан та ппурттуву та цу уссарив кIулну бивкIун бакъар. Извещение къаляркъуну дур. «Телефондалул номер кьабити, дуркIувкун, оьвчинна, ина оьна шиккун къазанан», – увкуну бур Наидал. Извещение дуркIун дур хъиривмур кьини. Пучрал отделениялийн увкIун, арцу ликкан нанисса чIумал, кIул хьуну бур паспорт хъамабивтун увкIшиву. ЦIунилгу тIайлабацIу къашаврия пашман хьуну, цайна цува дяъвай, чIавахьулттичIа авцIуну ивкIун ур. Тти ва адамина цIунилгу цукун занаитави тIий, Наидал цила паспортрай лирккун арцу, дуллуну дур, ва цу уссарив, яла цитIий укканссарив къакIулнува. Арцу чансса къадиркIун дур. Дибиргу барчаллагьрай лавгун ур. Яла, хьулуха зана ивкIун, цIувххуну бур: «Ина лаккудушвагу бакъарав?» – куну. Ванилгу бувсун бур цуппа Уриннал шяравасса бушиву.
– Щиясса бура? Урими ттун кIулссар. ЧIявуну Ххутияту бигьалагай кьинирдай ттула дусначIан, школалул директор АмирдучIан, учIайссияв.
– Му ттул гъанчури. Мунал кIива ссу Сочилий ялапар хъанай буссар. ЧIявуну лагайссара гайнначIан, – бувсун бур Наидал. Дибиргу Наидащал кIул шаврия рязину лавгун ур.
Гъумучиял педучилище къуртал бувну махъ 9 шинай школалий зийгу ивкIун, Пединститутравун уххан ччисса Дибир, шяравучу Агъакиши Мудуновлул маслихIат бувну, Медициналул институтравун увхссар.
Дибир Гъумук Педучилищалуву дуклакисса чIумал ванащал дуклай буссия ттул ссу Гьидаятгу. Вайннащала ца курсрай ивкIссар «лакрал Левитан» тIий цIа дурксса Гъаза Гъазаевгу. Дибирдул бувсун бия мунахь цащала дуклай бивкIсса Гьидаятлул гъансса душнищал хьунаавкьушиву пучрал отделениялий ва ганил цанма кумаг бувшиву.
ТIутIал кацIгу лавсун, Наидащал кIул хьун Гъазагу увкIун ур. Барчаллагь увкуну бур инсаншиврийсса тIул дурнутIий.
Гъазая ихтилат багьувкун, букъавсун битан къахьунссар ца укунсса затгу. Гьидаят МахIачкъалалив Пединститутраву дуклакисса чIумал, му хьунабавкьуну бия цала иширттай нанисса Гъазан. Му чIумал Гъаза радиолий зий уссия. Гъазан хIисав хьуну бур дяркъусса кIинттул чIумал Гьидаят кIюлану ларххун бушиву. Педучилищалуву дуклакисса чIумалва Гьидаятлул ххуйну балай учайшиву кIулсса Гъазал оьвкуну бур мунийн лакку передачалун ца-кIива балай учин.
– Ми балайрду чивчукун, вин, пальтолух дакъасса, цайми янналухссагу арцу хьунтIиссар, – увкуну бур ванал. Та ппурттуву чивчусса Гьидаятлул балайрду чIявуну итабакьайссия радиолувух. Гъаза аьпалухьхьун гьаннин ссил ванащал дахIаву дуссия. Ччя-ччяни телефондалувух оьвчайссия цаннал цанначIан. Та арцу дакъасса захIматсса чIумал ванал цинма бувмур дакIний бикIай ссин уттигу.
Та чIумалсса дяъвилул ва дяъвилия махъсса шиннардий хъуни хьусса оьрчIру-душру инсаншиву ххисса, куннал куннах ччаву дусса, чIарав бацIан, кумаг бан хIадурсса бикIай. Гъазагу мукунасса ия.
Аьпа баннав Гъаза Гъазаевлулгу, Дибир Дибировлулгу. Алжаннул агьулданувух хьуннав. Зугу циняв цIуллуну, сагъну битаннав.
Зу ххирасса
Анисат Уцумиева,
ш. Сочи
Таржума бувссар Андриана Аьбдуллаева
