Дуккаврил шин къуртал хъанай, республикалул цинявппагу школардай бивщунни Махъва-махъсса гюнгутIи. ЦIуссалакрал райондалул 23-ма школалийгу, гьар мудан кунна, лавайсса даражалий ларгунни школалущал дуклаки оьрчIру личIи хъанахъисса, ххариссагу, пашманссагу асарду хIала бувхсса байранну. Цаннияр ца асар хьунсса бия школардайсса шадлугърал мажлисру.
Гьашину ЦIуссалакрал райондалий 11-мур класс къуртал бунни 189 оьрчIал, 9-мур класс – 700-ннал. Аьдатравун багьсса куццуй, байрандалун хасну чIюлу дурну дия школардал хIаятру. Бюхттулну баллай бия музыкалул чIурду. ТIутIавун багьлавгун бия учительталгу, выпускникталгу. ОьрчIан тIайлабацIу чIа тIисса ихтилатру бунни директортурал, учительтурал, администрациялул вакилтурал ва нитти-буттал.
ОьрчIру цIусса оьрмулул ххуллийн тIайла буклай, тIайлабацIу чIа тIисса ихтилат бунни ЦIуссалакрал райондалул бакIчи МаматIи ХIамзатовлул.
– Ххирасса оьрчIрув, школалий дуклакисса шиннардий зу ккаккан бунни дуккавриву итххявхсса, яхI-къирият дусса, хъунанал хIурмат бусса, ххуйну тарбия бувсса оьрчIру бушиву. Ттун щак бакъар зу гихунмайгу, зула оьрму мукунма лайкьну бутлай, школалул цIа бюхттул дантIишиврийн. Утти выпускниктал экзаменнайн хIадур хъанахъисса, гьалак буклакисса чIун гъан хъанай дур. ЧIа тIий ура цинявппагу выпускниктуран цала язи бувгьусса ххуллийх кьянкьану бачинсса кьудрат, – увкунни райондалул бакIчинал.
Хъирив выпускниктурал ва миннал нитти-буттал барчаллагь увкунни учительтурахь.
Школа къуртал буллалиминнал шадлугърал даражалий кIулшивурттал кIула дуллунни хъирив нанисса дуклаки оьрчIахьхьун.
Имара Саидова
