ЦIуссалакрал райондалий ЦIуссачIурттащиял шяраву шадлугърал даражалий тIиртIунни Буттал кIанттул цIанийсса Хъунмасса дяъвилул гьурттучитурал аьпа абад буллалисса гьайкал. Ва дацIан дунни ЦIуссачIурттащиял школалул хIаятраву.

Мероприятиялий гьуртту хьунни ЦIуссалакрал райондалул бакIчи МаматIи ХIамзатов, Дагъусттаннал Халкьуннал Мажлисрал депутат Артур Исрапилов, цIуссалак цIусса миналийн бизан баврил ва Аухуллал район цIу дуккан даврил масъаларттаха зузисса Дагъустта­ннал ХIукуматрал управлениялул хъунама МахIаммадхIажи Айдиев, ЦIуссалакрал райондалул бакIчинал хъиривчутал Арсен Гъазиев ва Амир Султанов, ЦIуссачIурттащиял шяраваллил бакIчи Карим Каравалиев, ЦIуссалакрал райондалиясса хасъсса аьралий операциялул гьурттучи Альбина Къапланова, райондалул идарарттал каялувчитал, шяраваллил жямат.
Мажлис тIитIлай, ихтилат бунни МаматIи ХIамзатовлул. Ванал кIицI лавгунни гьайкал дацIан даву щалагу ЦIуссалакрал райондалун агьамшиву дусса иш хъанахъишиву, чIурчIав дунни Буттал кIанттул цIанийсса Хъунмасса дяъвилий совет халкьу­ннал ккаккан дурсса къучагъшиврий, барчаллагь увкунни ва даву дузрайн дуккан дан гьур­ттушинна дурсса цинявннахь. Артур Исрапиловлул кIицI лавгунни гьайкал дацIан даврийну жува дакьаврил ва тархъаншиврул цIаний жанну дуллуминнал аьпа абад буллалишиву. Ванал оьвчаву дунни жагьилсса никирайн жула билаятрал къучагъсса тарих ябувара куну.
МахIаммадхIажи Айдиевлул барчаллагьрай кIицI лавгунни ветерантал ва къинттуллух зий бивкIми.
Ихтилатру къуртал хьуну махъ гьайкалдануцI тIутIив дирхьунни. ЦIуссачIурттащиял дуклаки оьрчIал ккаккан дунни концертрал программа.
Мариян Илиясовал цIанийсса «Дараччи» ихIсандалул фондрал президент Гулшан Хасаевал бувсунни Буттал кIанттул цIанийсса Хъунмасса дяъви байбивхьусса чIумал циксса инсантал лавгссарив ЧIурттащиял шярава Ватан дуруччин, бувсунни кIи-кIия, шан-шама арсру дяъвилия зана къавхьусса кулпатирттая.
Альбина Къаплановалгу бувсунни Хъун дяъвилий жула халкьуннал ккаккан дурсса къучагъшиврия, кIицI лавгунни хIакьину хасъсса аьралий операциялий хьхьичI ххуттай бавцIуну билаятрал мурадру буручлачими­ннан эбратну хъанахъишиву Хъун дяъвилул ветерантурал къучагъшиву.
Карим Каравалиевлул барча­ллагь увкунни гьайкал дацIан дан кумаг бувсса цинявннахь.
Ахирданий цинявннал цачIусса сурат рирщунни гьайкалданучIа.
Мажлис дакIний личIансса хьунни.

Андриана Аьбдуллаева