Вай гьантрай Дагъусттаннайн бувкIунни Аьрасатнал МИД-рал Информациялул ва печатьрал департаментрал директор Мария Захарова. КьатIаллил билаятирттаясса журналистътурансса медиа-тургу хIисаврайсса аьрххилий. Итникьини ванил Дарбантливсса Нарын-Къала ххал бунни. Ванищал бия Дагъусттаннал БакIчинал ва ХIукуматрал администрациялул хъунаманал хъиривчу Рашия Аьлиева, культуралул министр Зарема Буттаева, Аьрасатнал МИД-рал МахIачкъалаливсса вакил Марат ХIусманов ва цаймигу хъамал.
Дарбантуллал къала ххал бувну махъ вай бивуна Жумяъ- Мизитравун ва арманинал килисалувунгу.
Хъирив кьини МахIачкъалалив, кьатIаллил билаятирттаясса журналистътал гьурттусса брифинграй Захаровал Аьрасатнал виваллил политикалул хIакъиравусса суаллахьхьун жавабру дуллунни.
– Лахьхьу самолётраву ттущал ца группа бия, туристалли учин къахьунссия. Бигьалаган нанисса агьлу лявкъуна. Ттун тамаша бивзмур му бия, зунттал тIабиаьтрал ххуйшиву ккаккан дуллалисса суратру ххал дуварчагу, агьаммур иш цамунивур бусса тIий бия. На бура: –ТIабиаьтраву бакъа, ссавур бусса иш тIий, хьхьири, музейрду, яла цир? – Винмагу кIул хьунтIиссар, – агьалинал хъамал ххирашивур ва дакIурдил ххуйшивур, тIий бия. Мяйжаннугу, хIайран буллалисса дур Дагъусттаннал агьалинал культурагу, хъамал ххирашивугу, – увкунни Марина Захаровал.
МаслихIатгу бунни ванил бигьалаган ччиминнан Дагъусттан язи бугьан. КIицI лавгунни республика экономика сантирай ва лябуккулий нани дансса ххуллийх най душивугу.
– Дагъусттан – Аьрасатнал кьиблалул чулийсса агьамсса регионни, дунияллул халкьуннал хьхьирирдачIансса тIайланмасса ххуллугу бусса, транспортралгу агьамсса бурхIлур, – увкунни ялагу ванил.
Бувсунни Дагъусттаннай зий бушиву миллатирттал 11 театр, чIал къавхьуну Дарбантливсса Азирбижаннал паччахIлугърал театргу бакьин бувну къуртал бантIишиву.
ПатIимат Рамазанова
