Вай гьантрай МахIачкъалалив Расул ХIамзатовлул цIанийсса Миллатрал библиотекалуву лавайсса даражалий ларгунни «Ккавкказнал ххаллил арсру. Сурхай-хан I-ма» тIисса Хизри Илиясовлул луттирал презентация.

Шикку гьуртту хьунни личIи-личIисса жаваблувсса къуллугъирттайсса инсантал, аьлимтал, жяматийсса, политикалул ва диндалул ишккаккулт, Дагъусттаннайсса ва республикалул кьатIату бувкIсса Сурхай-ханнал наслулул вакилтал, студентътал, дуклаки оьрчIру, Ппалассуннал жяматрал вакилтал.
Мажлис бачин бувну ия Шалласу Шалласуев. Ванал кутIану бувсунни оьруснал Петрдуйн ва Ираннал Надир-шагьлуйн, цIакь бусса хIукуматгу, хIат-хIисав дакъасса аьралгу бусса паччахIлугъирттайн данди увксса личIлулсса политик ва гьунар бусса аьраличу, бусалдаравун агьсса Сурхай-хан I-ная (Чулахъ Сурхайя), кIицI лавгунни гьашину Дагъусттаннал цIанихсса арс Сурхай-хан I-ма увну 345 шин хъанай душиву.

Хизри Илиясовлул цIа нукIура машгьурну дур творчествалул агьулданул, интеллигенциялул дянив. Щап куну бувцIусса залданулгу, Хизрия махъ учин ччиминналгу цал уттигу тасттикь буллай бия авторначIансса хIурмат, ванал бусравшиву.
Хизрия бусласисса, ванал творчествалун лавайсса кьимат бишлашисса ихтилатру бунни Дагъусттаннал халкьуннал шаэр Мирза Давыдовлул, «Литературалул Дагъусттан» ва «ЧIавалачин» журналлал редакциялул хъунама редактор Мурад МахIаммадовлул, Дагъусттаннал Жяматийсса палаталул председательнал хъиривчу Ссапарбаг Аьбдуллаевлул, Шагьрулул округрал Депутатътурал мажлисрал председатель Марис Илиясовлул (ванал дуллунни Хизрин Шагьрулул Депутатътурал мажлисрал чулуха­сса ХIурматрал грамота), тарихрал элмурдал доктор, профессор МахIаммад ХIасановлул, филологиялул элмурдал кандидат, чичу, Сурхай-ханнал наслулиясса Жанна Абуевал, социологиялул элмурдал доктор Рустам Ибрагьимовлул, СВО-лий цалчин Аьрасатнал Виричунал цIа ларсъсса НурмахIаммадлул буттал Энгельс ХIажимахIаммадовлул, тарихрал элмурдал доктор, профессор Закария Нахибашевлул, философиялул элмурдал кандидат Аьбдуссалам Магьдиевлул, «Зунттал хъами» журналданул лакку мазрайсса выпускрал редактор Аьжа АьбдурахIмановал, «ЧIавалачин» журналданул редактор Сиянат ХIажиевал, Дагъусттаннал луттирду итабакьай идаралул директор Марина Оьмаровал, филологиялул элмурдал кандидат ПатIимат Оьмариевал, авторнал ниттиу­ссу, физикалул ва математикалул элмурдал доктор Халид Аьбдуллаевлул, Ппалассуннал аксакал ЖахIпар МахIаммадовлул, Сурхай-ханнал наслулиясса ссурвал Халунмисиду, Аьжа ва Индира Сурхайхановахъал, «Ябувара жулва миллат» ва «Буттал кIану» ккураннал вакилтал Аьли МахIаммадовлул, Рамазан ХIасановлул, Валида Исакьовал, Басира Щамххаловал, Шамил Дибировлул, ХIажимурад ал Ккулил, шаэр МахIмуд Аьли­ловлул.

ХIурматрай вичIи дирхьу­нни гьурттучитурал Къабардин-Балкьарнава бувкIсса, Сурхай-ханнал наслулиясса хъамаллурах: Къабардин-Балкьарнал НЦ-лул РАН-лул директор, техникалул элмурдал кандидат Залимхан Нагоевлул, художник, скульптор Ибрагьим-Халил Сурхайхановлул ихтилатирттах. Ибрагьим-Халиллул бахшиш дунни Хизрин цала дирхьусса сурат. Ихтилатгу бувну, Хизрин ХIурматрал грамотагу дуллунни Дагъусттаннал Кинематографистътурал союзрал председатель Александр Евтушенкол.
КIицI лаган, «Сурхай-хан» тIисса фильмрал сценарий чирчуну махъ Хизри кьамул увссар Кинематографистътурал союзравун, махъ – правлениялувунгу.
Ихтилатчитурал гьаз бунни МахIачкъалаллал ца агьамсса кIичIираваллин Сурхай-ханнал цIа дизаврил ва ванан гьайкал дацIан даврил масъала.
Шаэр Бахттун Гъазиевал був­ккунни Хизрин хас бувсса цила шеъри.

МахIачкъалаллал 18-мур школалул дуклаки оьрчI Зулпукьар Илдаровлул ва лакку мазрал учитель ПатIимат Аьлиевал хIадур бувсса МахIачкъалаллал 16-мур школалул дуклаки оьрчIал дурккунни назмурду.
Мажлис чIюлу бунни ХIажи­аьли ХIажиаьлиевлул, Тамара Закарияевал, Жанна Кьурбано­вал, Халисат Батырбековал балайрдал.
Хизри Илиясов цала даражалух, лайкьшивурттах къаурувгун, нач-ламусъсса, хьхьичIун къаличлачисса ур. Ванал гьарица чулухасса гьунардануцIун, захIмат ххирашивруцIун, творчествалул ва элмулул ххуллий­сса ккаккиярттацIун му хасиятгу кIицI лаглай бия сайки циняв ихтилатчитал.
ДакIнин бутан, 2023-ку шинал Хизрил буккан бувссия цIанихсса Чулахъ Сурхайл арснал арсная Сурхай-хан II-ная (Хъунбуттая) бусласисса «Сурхай-хан II-ма Гъази-Гъумучиял – Ккавкказуллал дяъвилул виричу» тIисса лу.

– Тарих кIулшиву – му халкьуннал цIанамуничIансса ва бучIантIимуничIансса кIулар, – учай Хизрил.
Ванал багьа бищун къашай­сса даву дурссар жула тарихрал ишру аьч бан, цIанихсса цIарду аьлтту дан, лавгмур цIу буккан бан. ЧIун ларгун махъ хъиннура дурчIлантIиссар вай луттирдал агьамшиву, хъиннува барчаллагьрай бикIантIиссар миллатрал тарихрал ишру хъамабитала къахьун хъуннасса даву дурсса авторнайн.

Андриана Аьбдуллаева