Майрал 25-27-нний Минеральные Воды шагьрулий хьунни Ккавкказуллал инвестициярттал форум. Ваний гьуртту хьунни Аьрасатнал регионнаясса, СНГ-лул хIукуматирттаясса 4 азарунния ливчусса инсантал.
Форум сакин дурну дия Росконгрессрал Фондрал Аьрасатнал Федерациялул Экономикалул министерствалул кабакьаврийну. Гьашинумур форумран цIа дия «Инвестиционный путь: прошлое, настоящее, будущее».
Форумрал деловой программалул лагрулийсса давурттавух хьусса пленарный заседаниялий гьуртту хьунни Аьрасатнал Федерациялул ХIукуматрал Председательнал хъиривчу, Ухссавнил Ккавкказуллал Федерал округрал куратор Александр Новак. Цалва ихтилатраву ванал кIицI лавгунни ххаллилсса гьава, тIабиаьтрал аваданшивуртту дусса, географиялул чулухагу ляличIисса кIанттурдай бивхьусса, цайми-цаймигу ляличIишивуртту дусса Ухссавнил Ккавкказ хьхьичIунмай шаву Аьрасатнал Федерациялул президентнал ва ХIукуматрал председательнал личIиссара къулагъасралу бушиву, билаятрал каялувшиндарал лагрулий шаймур буллантIишиву СКФО-рая бигьа-рахIатсса, мюхчансса регион хьуншиврул. Мукунма ххал бивгьунни виваллил туризм, агропромышленный комплекс, транспортрал инфраструктура ва чIявусса цайми-цаймигу бутIри хьхьичIунмай баврил масъалартту. Хъуннасса къулагъас дия кIулшиву дулаврилми ва зунсса кадрарду хIадур баврилми масъаларттах.
Форумрал лагрулий вай гьантрай хьунни чIярусса давуртту, вайннувух – ХIукуматирттал дянивсса комиссиялул заседаниягу, цувгу хас дурсса Аьрасатнал ва Кьиблалул АьсатIиннал социал-экономикалул уртакьшиву хьхьичIуннай даврин, мукунна Аьрасатнал Федерациялул ХIукуматрал председатель Михаил Мишустингу гьурттусса ХIукуматрал комиссиялул заседание.
Гьашинумур форумрай чIурчIав дуллай бия жагьилтурал ва кIулшивуртту дулаврил проектирдай, мукунна экологиялул мюхчаншивруцIун бавхIуми масъаларттайгу.
Ккавкказуллал инвестициярттал форумрайн бивунни 32 билаятрал вакилтал. Форумрал гьантрай хьусса 78 мероприятиялий гьуртту хьунни 430 спикер, чирчунни 206, 833 млр къуруширттансса 86 кьутIи, вайннувух чил билаятирттал компаниярттащалсса 5 кьутIигу.
Бадрижамал Аьлиева
