Майрал 5-нний МахIачкъалалив полициялул зузалтрайн ххявхсса террористътуращалсса биту-ххитулуву ккуллалул ва чIиллул щавурду хьуну, цува оьттул ливцIуну най уна, къачагъ, ярагърацIагу увну, увгьума ур полициялул хъунама сержант, Арсеннул арс Мурад МахIаммадов, цувагу Мукьариятусса. Дагъусттаннал бакIчи Сергей Меликовлул хIукмулийну га кьини къачагътурайн данди бувксса полициялул зузалтран, вайннавух Мурад МахIаммадовлунгу, вай гьантрай дулун ккаккан дунни ХIукуматрал награда – «За проявленное мужество» медаль.
ОьрмурдацIа хьусса полициялул зузалтрал кулпатирттан булунтIиссар ца-ца миллион арцул, щавурду дирминнан – ххютту-ххюттуршазарда къуруш. Гай гьантрай республикалул циняр соцсетирттавун дагьсса видеороликрайсса полициялул зузала ва террорист, цаннацIун ца лавчIусса къачагънал канища чIила зерххума Мурадри. ЦIана ва ур госпитальданий хъин хъанай.
Мурадлухь дарс дирхьусса Уриннал школалул учительница Асли МахIаммадова буслай бур, ва чIивинийва нигь дакъасса, зирангсса, хIакьсса зунтталчунал хасият дусса оьрчI икIайва тIий.
Увну ур Мурад 1999 шинал. Школагу къуртал бувну, дуклан увххун ур МахIачкъалалив Автодорожный колледжравун. Дуккавугу къуртал дурну, аьралий бурж биттур бан армиягу лавхъун, зун увххун ур Кировский РОВД-лийн.
Ванал ппу Арсен зий ур шяраваллил советрай, райондалул военкоматрал зузалану, ниттил – ЧукIуннал шяравасса МухIсиннул душ Зулайхатлулгу, чIярусса шинну хьуну дур Уриннал школалий байбихьулул классирттал учительницану зий.
Арсен, Зулайхат, барчаллагь зун укунсса арс тарбия аврихлу! Аллагьнал вания тихунайгу урувччуну лякъиннав, ванацIун ванащал архIал жула агьалинал мюхчаншиврул ялув бавцIусса полициялул циняв зузалтгу!
Зунттал чувнал къирият
Мукьардал Мурадлуха
Чаннасса интникьини,
Ина къуллугърай уна,
КIул бакъа бала-хатIа
Вил ялун бивну бия.
Шагьрулул кIичIираву
Низам дуручлай уна,
Чариввагу къакIулну,
Бувккун лавмарт душмантал,
Ккуллардал цIу дирхьуна,
Зу циняв литIунну тIий,
КIусса щавурду дирну
ХIал ласласисса ина –
Къуртал ан кьаст лархIуну,
Душман ялун ххявххуна.
Аскисса душманнахьхьун
Мададгу къабуллуну,
Оьттул лицIлай унува,
Душман къуртал увуна.
Буттал буттал цIакьшиву
ДиркIун дур вил дакIниву,
Зунттал чувнал къирият
ДиркIун дур вил оьттуву.
Асли МахIаммадова,
ш. Урими
Залму АьбдурахIманова
