Вай гьантрай СВО-лул Аьрасатнал цалчинма Виричу НурмахIаммад ХIажимахIаммадовлул нину, МахIачкъалаллал 54-мур школалул директор Сапижат Мазаева Къиримнаву «Артек» центрданийсса мероприятиярттай гьуртту хьунни.
Центрданий Аьрасатнал Просвещениялул министерствалул кабакьаврийну хьунни «ДакIний буссару! Пахрулий буссару! Ябуванну!» тIисса цIанилусса, оьрчIахь билаятрал бюхттулсса тарихрая бусласисса форум.
Ливадийский дворец-музейравусса ва форумрай гьуртту хьунни Германиянавасса, Таджикисттаннаясса ва Белоруссиянавасса делегацияртту. Хъамаллуравух-экспертътуравух бия ветеран-блокадница Валентина Черкасова, Аьрасатнал Виричу Роман Кулаков.
Ва форумрай гьуртту шаврицIун, Сапижат Дагъусттаннаясса оьрчIащалгу хьунабавкьунни, Совет Союзрал кIийла Виричу АхIмад-Хан Султаннул гьайкалгу дусса Вирттаврал аллеялийнгу бивунни. Сапижатлул Чувшиврул дарсру дирхьунни тикку бигьалаглагисса оьрчIахь. «Артекрай» оьрчIан тарих лахьхьин буллалисса ва Ватандалухсса ччаву цIакь дуллалисса хъуннасса даву дуллай бур.
– Хъун дяъвилий Ххувшаву ларсун 80 шинал юбилей кIицI лаглагисса гьантрай ветерантуращал ва центрданул хъамаллуращал архIал бивру Вирттаврал аллеялийнгу, Чувшиврул мемориалданучIангу. Бюххансса махъру лавхъуна хъамаллурал. ОьрчIащал архIал тIутIив дишарду гьайкаллацI. ОьрчIал ттун экскурсиягу бувна, «Морской» тIисса лагерьданийнгу бивра, «Алхъаннал паркравун» ххяллайх лахъай кIанайн, «Мурадирттал мурхьирачIан», гьар кIанайн бивра. Бюххансса асарду кьабивтунни Чувшиврул дарсирдал. Луганскалиясса ва Донецкалиясса оьрчIругу видеосвязьрайн бувккуна. ОьрчIру чIявусса суаллу буллай бия: НурмахIаммад чIивиний цукунсса оьрчI икIайва, аьралийчунал пиша циван язи бувгьуна тIисса. Бия СВО-лийн циван лавгуна, арцу лякъин аьрайн най бур чиваркI тIий бурхха хъуними тIисса суалгу. Сивсуну, аьчухну гъалгъатIий бия оьрчIру. Ца оьрчIал буллуна виричушиву цир тIисса суал. Ванихьхьун жаваб дуллай, цаманал увкуна: «Виричушиву – ина, вила пикри къабувну, цайминнай дакI аьтIий дурсса давур. Вила мачча-гъанми, вила аьрщи, вила Ватан дуруччаву мурадрай, хIатта виламур оьрмулун нигьачIин духьурчагу, жан ххира къадурну». Ттун ва оьрчIал куртIсса жаваб асар хьуна, укунасса ивкIунтIий НурмахIаммадгу. Инсантурал ва Ватандалул цIаний цIаравун ххяххан хIадурнувасса ва ххявххун лавгсса. На ва оьрчIан художникнал дурсса арснал сурат пишкаш дурссия, школалунгу НурмахIаммадлул оьрмулул ххуллия бусласисса цаппара луттирду буллуссия. Бивра на Ялталийсса лачIун буккаврил секциялийнгу. Ва хьунабакьаврихлу барчаллагьрай бура ва шагьрулийсса Спортрал (спортивная борьба) федерация хIасул бувсса хъунама тренер НурмахIаммад НурмахIаммадовлуйн ва тренертурайн – Лукерья Драгуновайн ва Расул Самадовлуйн. ЧIава спортсментал личIлулну вичIи дирхьуну бия бусласимуних. «Артек» ца хъунмасса кулпат бушиврул гъилисса асарду ливчIунни дакIниву, оьрчIаву хIакьсса патриот асарду цIакь буллалисса давуртту щириркIуну дия, – увкунни Сапижат Мазаевал.
ПатIимат Рамазанова
