Вай гьантрай ЦIуминалийсса Чапаево шяравусса «Солнышко» садикрал зузалтрал ва тарбиялувтурал экскурсия бунни МахIачкъалаливсса ОьрчIал ва чIаважагьилтурал автошколалийн.
Шикку оьрчIру хьунабавкьунни ДЮАШ-рал директорнал хъиривчу Ися-МахIаммад Султановлул, педагогтал Амина МахIаммадовал ва Мадина Тавбулатовал. Экскурсиялул мурад хъанахъиссар оьрчIан машинарттал ххуллурдайсса низам лахьхьин даву ва ххуллурдай оьрчIру хIаласса апатIру чан баву.
Педагогтурал оьрчIахь ва нитти-буттахь бунни профилактикалул ихтилатру, бувсунни машинарттал ххуллурдай мюхчаншиву дуруччаву мурадрайсса насихIатру. Ккаккан дунни оьрчIан машинарттал ххуллурду лахъан лахьхьин буллалисса «Уроки тетушки Совы» тIисса мультфильм ва «Дорожные знаки» тIисса видеоролик. Машинарттал ххуллурдайсса низам лахьлансса гъира багьаншиврул оьрчIащал автошколалул площадкалий бунни личIи-личIисса тIуркIурду. Ва экскурсиялий оьрчIан чIявусса мюнпатсса затру кIул хьунни.
«Солнышко» садикрал хъунмур Оксана Исмяиловал барчаллагь увкунни оьрчIахь ххуллурдай низам дуруччавриясса ихтилатру бувсса автошколалул зузалтрахь.
Ися-МахIаммад Султановлул махъ буллунни «Солнышко» садикрал оьрчIащал ччя-ччяни хьунаакьлан ва ххуллурдайсса низам дуруччаврия буслан.

Имара Саидова